Lis dôs musis de Europe: atente a dirits e ambient, pierdude e fûr scuare in cont de pâs

Dentri de fin di Setembar, tal Parlament European (PE) si tornarà a fevelâ dal Tiliment. La cuistion de difese de naturalitât dal flum furlan e de contrarietât ae costruzion di chê che le clamin “la travierse di Dignan” e vignarà frontade intant de ativitât dal PE a Brussel. La date e varès di jessi chê di Joibe ai 25, cuant che a vignaran presentâts i contignûts de Petizion, prontade ancjemò in principi dal an e acetade tal mês di Mai stât cun protocol numar n. 0144/2025 de bande de Comission specifiche de Assemblee dai rapresentants dai citadins de Union Europeane (UE).
◆ La Petizion – lant daûr di ce che a àn mostrât diviers esperts e studiôs e di ce che a denunziin citadins ugnui e comitâts – e marche il fat che chê e je une infrastruture cjaronone in tiermins economics, inutile par ce che al tocje la sigurece e il control des aghis e fintremai pericolose pal ambient, pes aghis stessis e pal benstâ de int, tal Friûl de Alte, tal Friûl di Mieç e fintremai ancje in chê part de Basse, dongje de bocje dal flum, là che uns pôcs di lôr, poiâts e salacor sburtâts dai sorestants di Triest che a vuelin fâle sù, a pensin che impen e varès di jessi la soluzion di ducj i problemis.
◆ Za tal mês di Fevrâr stât la cuistion e jere stade ogjet di une interogazion fate indenant de eurodeputade dai Verts, Cristina Guarda. La acetazion de Petizion e la audizion cuntune delegazion di cui che le à proponude, che la prime di lôr e je Valentina Sovran, a confermin bielzà la legjitimitât e la validitât des osservazions e des denunziis fatis indenant cuintri de “travierse”. Cun di plui a dan ancje conferme dal fat – compagn de sentence de Cort di Justizie de Union Europeane (UE) in cont di domandis di asîl politic, dai rimpatris e soredut dai control jurisdizionâl dai “Paîs sigûrs” – che lis istituzions de UE a son ancjemò un riferiment sigûr par ce che al tocje partecipazion democratiche, dirits, ambient e justizie.
◆ Magari cussì no, no si pues dî la stesse robe in cont dal rûl de UE inte suaze des relazions internazionâls. Cheste situazion e à cjatât conferme in ocasion dai ultins vertiçs là che si à discutût dal conflit tra Russie e Ucraine, tacant dal incuintri de Madone di Avost tra Trump e Putin in Alaska e di chel seguitîf tra il president USA e chel ucrain, Volodymyr Zelenski, compagnât de presidente de Comissione Europeane (CE), Ursula Von Der Leyen, e di une delegazion di uns pôc di cjâfs di Stât e di guvier dai Paîs europeans. Al è evident che chei che a comandin e che a menin la danze a son i incuilins de Cjase Blancje e dal Cremlin, cui leaders europeans che a movin la code lant daûr di chel o di chel altri e cu la Von Der Leyen che e va daûr di lôr, che a sedin il president francês Emmanuel Macron o il cancelîr Friedrich Merz o ben Keir Rodney Starner, il premier dal Ream Unît, un Stât che dopo de Brexit nol fâs plui parte de UE.
◆ In cont di cheste situazion e à cjapât posizion ancje la Aleance Libare Europeane (ALE), marcant la dibisugne di une partecipazion ative e autorevule de UE tes tratativis par fermâ il fûc daurman e par sierâ pardabon il conflit, lant daûr dal dirit internazionâl, la cjarte des Nazions Unidis (NU) e dal principi di autodeterminazion dai popui.
◆ La situazion e je ancjemò plui grivie e plui penze tal câs de cuistion palestinese, sei cun riferiment aes iniziativis politichis e militârs dal Stât di Israêl a dam di Gaza e de Cisjordanie e al lôr impat devastant su la popolazion civîl sei par ce che tocje la iniziative pardabon scjarse de stesse UE e dai guviers dai siei Stâts membris, cundut de posizion de opinion publiche europeane e mondiâl che in maniere une vore maioritarie e mostre di vê lis ideis plui claris dai diviers sorestants. In cheste suaze a meretin ricuardadis lis iniziativis di proteste e solidarietât metudis adun, par esempli, tal Paîs basc, in Galizie, in Catalogne, tal Gales, in Scozie, in Irlande e in Sardegne. Alc si môf ancje in Friûl. E nol podarès jessi diferent. ❚