Libris: pai zovins plui inglês e mancul sloven

Al à fat scjas l’ultin scandai de Agjenzie slovene dal libri (JAK), che al ven fat ogni cinc agns. Midiant di dute une schirie di domandis a 1.011 di lôr, dai 18 ai 75 agns di etât, a son vignûts fûr risultâts di une bande positîfs, di chê altre par nuie bogns. Une cjosse dal sigûr buine e je che il câl dal numar di chei che no lein libris al pâr jessisi fermât: di fat, il 42% de int al à dit di no vê let nancje un libri vie pal an passât, biel che tal 2019 al jere il 49%. Di chê altre bande, dome il 33% al à dit di vê let almancul trê libris, cence tignî cont dai libris di scuele e di universitât e nancje di chei di lavôr. Il dât che al à fat restâ scaturîts i ricercjadôrs al è stât chel sui zovins dai 18 ai 24 agns. Di là dai libris che a coventin par studiâ, il 76% di lôr al à vût miôr comprâ libris par inglês che no chei te lôr lenghe mari. Ce vuelie dî cheste tindince? La gnove gjenerazion si staie dislontanant de fevele dal Stât nestri vicin, cjalant masse viers il rest dal mont simpri plui globalizât? Tal coment finâl, i esperts de JAK a fevelin dome dal risi de tignude de lenghe slovene, massime in cont de capacitât des gnovis gjenerazions di vê une paronance perfete de lenghe, soredut di un pont di viste lessicâl e gramaticâl, stant che il sloven al à la particolaritât di jessi une des pocjis lenghis a vê la forme duâl des personis tai verps. Cun di plui, al è interessant viodi che il 5% dai letôrs al à let libris par talian, lenghe dut câs uficiâl te part slovene de Istrie.
◆ Un altri dât no a pro dal mantigniment dal sloven al è che, vie pal an passât, la percentuâl di letôrs che a àn finît di lei almancul 10 libris te lenghe nestre vicine e je stade dal 13%.
◆ Ma cemût vadial il marcjât dal libri in Slovenie? Ogni an si vendin uns cinc milions di volums, un cuint di chescj a son libris di scuele e di universitât (in chest setôr il libri plui vendût al è un manuâl di Dirit roman!). Il marcjât librari al vâl 65 milions di euros; i compradôrs miôr a son i zovins fin a 24 agns, impen i piês a son chei cun plui di 50 agns. I gjenars plui cirûts a son chei de leterature di consum come i zâi e i manuâi par fâ lavôrs di bessôi in cjase. I cussì clamâts e-book (libris eletronics) a restin ancjemò pôc cirûts. ❚