L’EDITORIÂL – Un popul cence memorie al va a sbati sul tricolôr

Il balon nus pues judâ a capî forsit miôr la cuistion furlane. No parcè che o vin Zoff in cuviertine, ma partint propit de nazionâl o rivìn drets tal cûr dal probleme.
No crôt di dî nuie di scandalôs se o scrîf che la maiorance dai furlans che e sarà denant dal televisôr e tifarà pe Italie, fûr che dôs categoriis: chei che dal balon no ur free nuie e chei che no considerin Lippi e compagnie la lôr nazionâl. A son chei, e mi met tra di lôr, che a spietin, cuissà fintrimai cuant, di vê la nazionâl furlane. Mai come cumò o sin invidiôs dai nestris amîs slovens che, a paritât di teritori e cuasi di popolazion, a saran presints in Sudafriche cu la lôr scuadre.
Ma se lôr le àn e noaltris no, al sarà un parcè?
Di fûr dal balon a son altris, almancul doi, esemplis di cheste anomalie tricolôr: la Pan, la patulie acrobatiche, e i alpins. Il blanc, il ros e il vert a deventin, o fevelìn simpri de maiorance, un simbul cuasi furlan, il procès di identificazion tra la int e lis dôs istituzions, e somee une fusion.
Nol è un câs se ogni volte che si cjacare di gjavâ lis Frecis Tricolôrs di Rivolt e je burascjade, cence dismenteâsi des firmis tiradis sù par tignî l’8° a Cividât.
I furlans a deventin plui nazionaliscj di ducj e nol è ancjemò un câs se a cualchidun i lave ben, e i fâs ancjemò comut, il tiermin di piçule patrie rispiet a chê grande, la Italie.
Cjalait che la stesse robe e salte fûr tal Gurizan, dome che si scuen cambiâ riferiment: tal puest de Italie baste meti la Austrie.
Tai secui passâts nol jere cussì. Al di là di chel che e podarà inventâsi la retoriche par festezâ i 150 agns de unificazion, ogni om, femine, frutin, al veve clare la distinzion: di là a jerin i talians e di ca i furlans. Po dopo, a nord i todescs e a est i slâfs.
Semplicitât de gjeografie e de storie.
Talmentri naturâl la cussience che no si veve nancje di metile neri su blanc: te mentalitât contadine e stave tal ordin des robis, tant che l’invier e l’istât, la ploie e il soreli.
E duncje no coventavin bandieris, declarazions di indipendence: al sarès stât simpri cussì.
A fuarce di dâlu par scontât, no si son inacuarzûts che a planc a planc il tricolôr al vignive indenant e i furlans no vevin nuie di svintulâi denant.
La conclusion e je dome une: nol è a vonde jessi un popul, si scuen ancje savê di jessilu.
Dree Valcic