L’EDITORIÂL. Metisi adun te memorie par meti adun il doman

Chê altre dì, un tic sconsolât, Rem Spicemei, mi contave di une discusion cun pre Toni che e rivuardave i furlaniscj: «nol è scrit di nissune bande che si vinçarà cheste bataie, ma dut câs o vin di tignî ferme la nestre testimoneance». Cussì pre Beline e Spicemei al jere dacuardi.
Di un pôc di timp il pinsîr mi torne iniment, nancje tant lizêr a dîle dute, ancje parcè che se, cun razionalitât, o pensi che al sedi just, sot sot no soi tant convint.
Vinci par un patriote furlan al vûl dî viodi la nestre tiere libare. Libare al vûl dî vê il dirit di decidi noaltris il nestri destin. Lis formis, i trois di bati, ancje istituzionâi, a vegnin di rive jù di cheste afermazion di principi.
Trop contial duncje il risultât finâl? Secont me tantonon, anzit al rapresente il cûr de cuistion, parcè che cence rivâ da pît, dut al sa dome di idealisim.
No dome. Al è ancje il pericul di viodi l’autonomisim tant che une risultance individuâl e no di popul. Legjitime, pal amôr di Diu, ma sierade tal curtîl di ognidun e cence prospetive storiche.
Podìno salvâsi ognidun dibessôl? Ise avonde la testemoneance, magari consolade intun gruput, intune clape culturâl o, parcè no, te redazion di un gjornâl?
Vino duncje di rindisi, cuant che lis robis no van te direzion che nus plasarès, in timps che a somein chei di Matusalem, cun doi pas indenant e cinccent indaûr?
Vino di contentâsi di conservâ la flame o di cirî lens pal fûc?
O crôt che si scuegni fâ lis dôs robis dutun, parcè che a son leadis tra di lor: cence testemoneance no je memorie, cence memorie nol è doman.
No je tant la rassegnazion che e à freât i Furlans tai secui, ma pluitost il lôr individualisim, la lôr pocje voie di metisi adun. In chest câs propit la memorie, la fuarce de testemoneance, e à di puartânus a segnâ ducj chei moments de storie che a àn mostrât il contrari, che a àn fat viodi il nestri popul unît e po dopo vitoriôs in chel moment o suntune determinade cuistion.
Nol è un câs se la storie dal Friûl no si le insegne tes scuelis!
O disarai simpri grazie a Floramo pai tocs che a vegnin fûr chest an sul gjornâl: cheste e je veretât contade cence “paravoi” sul Nûfcent. Al bastarès che i nestris fruts plui grancj, ma ancje lis fameis, a leiessin i articui, par viodi la realtât di vuê in maniere difarente de retoriche taliane.
Di une vision critiche al è plui facil pensâ a cemût mudâ la realtât presinte, a fidâsi di chei altris, a metisi dongje par realizâ alc di gnûf.
In sumis: testemoneance vuê, e vûl dî, no dome no molâ, no dome resistence, ma gjavâsi vie lis crostis des barufis, des invidiis e des rivalitâts tra furlaniscj. Il “Pôcs, ma bogns” lu lassìn ae publicitât.
Dree Valcic