Sfuei Mensîl Furlan Indipendent
Archivi de Patrie

L’EDITORIÂL – I nevôts di Cesar no son mai muarts

............


Ce sens di fastidi – piês, di ribelion – ae gnove che al confin di Gurize al è stât screât un grant portâl tricolôr. Cussì, intant che ducj a pensin a cemût salvâ la Europe, noaltris – anzit, lôr – a cjatin la ocasion par tirâ fûr, ancjemò une volte, la muse dal nazionalisim. Si viôt che a jerin ruspiôs parcè che no jerin plui lis stangjis cu la Slovenie, cu la Jugo, come che tancj di lôr a continuin a clamâle cun dispresi. E alore, a àn pensât ben di segnâ il teritori intune altre maniere: cuntun arc blanc, ros e vert. Ma grant, che si viodi di lontan, che a capissin la diference: culì si jentre in Italie, la sclave di Rome.
Une solfe di italianitât che si pues viodi ancje intun altri aspiet, chel de scuele. In dutis a rivin, simpri plui dispès, tancj di chei bêçs par iniziativis, par progjets che a tocjin la cuistion de Dalmazie, dai dispatriâts julians, de italianitât de Istrie e vie indenant. A sburtin dal ministeri par che i nestri fruts, i furlans, si sintin obleâts a pensâ a chei events, a chê storie tant che storie lôr.
Ma no je vere! Chel event dramatic, lis sôs conseguencis no son ereditât nestre e, soredut, no àn di vignî doprâts par invelegnâ i rapuarts cui popui che nus stan dongje. La mê impression e je che si stedi cirint di soreponi une storie dute taliane su chê furlane. Il risultât al è daûr de puarte: la legjitimazion de Vignesie Julie ancje sot il profîl storic. I frutins a dovaran savê dut su Triest liberade e nuie dal patriarcjât di Aquilee.
Dal rest, di simpri la Italie si è mote cussì viers il Friûl: Forum Julii e Cesar su ducj, la love capitoline sul plaçâl de basiliche, propit a Aquilee, e prime ancjemò la “biele” idee che Dante al veve dai furlans e de lôr lenghe.
Confins dal imperi si jere, e cussì o sin restâts tal cjâf dai nevôts di Cesar.
O sì, cualchi ricognossiment: ae “razza Piave”, cuant che a fasin confusion cul Nord Est. Al lavôr, cuant che a àn bisugne di molzi la vacje, ai alpins, se i covente cualchidun di mandâ a murî cidin.
Cheste la Italie dal arc di trionf, la stesse che no si sumie par nuie di scrivi il censiment par furlan. No dome, ma ti oblee a rispuindi par talian.
Chest “Cesarisim” al dure di tant timp, bastarès visâsi di Mussolini e de sô propagande. E je dentri la mentalitât dai Talians, cheste idee di jessi parsore di ducj. A son chei che a ordenin la pastesute a Parîs, che a sberlin dentri i museus e che no fasin la file, parcè che a son furbos.
Vino di stâur daur, di simiotâju? Ce vino di imparâ de lôr storie? Parcè si dovaressial passâ sot il lôr arc tricolôr, come un popul vinçût?
DREE VALCIC