LABORATORI DI AUTONOMIE. 4. FLUMISEL, Economie

Il vantaç di vê vude la autonomie e la specialitât te nestre regjon si à podût pesâ un grum a nivel sociâl e economic dai agns Cincuante fin in zornade di vuê. Baste viodi cemût che che si son svilupadis tantis piçulis realtâts che a àn permetût di costruî un telâr resistent, fat di imprenditorie e di ocupazion. E dongje di chestis, planc a planc si son zontadis un pâr di grandis impresis che in cierts setôrs a àn podût e savût dî la lôr, rinfuarçant la struture economiche di dut il Friûl-Vignesie Julie.
Cun cheste premetidure, ai 13 di Novembar si è davuelzût l’incuintri dai Laboratoris di Autonomie, dedicât apont ae economie. Moderâts dal sindic di Flumisel Ennio Scridel, si son cjatâts a dibati il president de Confartesanât furlane e president de Bancje di Cividât Graziano Tilatti, il segretari de Cisl di Udin e da Basse furlane Roberto Muradore, il president de Cooperative di Cjasarse Mirko Bellini e il president de Secab di Paluce Luigi Cortolezzis.
Propit i doi presidents des cooperativis a àn volût evidenziâ che i modei che si basin su la  valorizazion de identitât furlane, dai siei valôrs e de braùre dai lavoradôrs di chestis tieris a son vincents e a puartin a otignî un vantaç competitîf a nivel talian, ma ancje european.
Bellini, par esempli, al à spiegât che i vins de cantine di Cjasarse, cuant che a vegnin comercializâts tal forest e in chês altris regjons talianis, si fasin cognossi prime di dut pe lôr ecelence e po dopo propit pal fat che, jessint stâts produsûts in Friûl, a son sinonim di garanzie, serietât e cualitât.
Un altre ecelence, in chest câs nassude in Cjargne, e je la Cooperative energjetiche de Val de Bût che, in plui di cent agns di storie, e je rivade a costruî un sisteme distributîf de lûs e de corint eletriche che al tocje sîs comuns, plui di sîs mil abitants e cuasi 3 mil socis, che rispiet al rest dal teritori a pain boletis plui bassis di plui dal 50 par cent. Un model che, volint, la regjon e podarès slargjâ e replicâ al rest dal teritori, cjapant dentri par esempli dutis chês centrâls a biomassis che a son  stadis costruidis in chescj agns.
Cu la crisi che o sin daûr a vivi di un pâr di agns in ca, vê sbassât il presi de energjie al sarès dal sigûr un vantaç competitîf di no pôc cont pes aziendis, clamadis simpri di plui a scombati cuntune concorence foreste che – di là dal confin, viôt dome Slovenie e Carinzie – e permet di fâ imprese tant plui facilmentri che culì di nô.
Dal sigûr, cemût che a àn fat notâ i partecipants al dibatit, no si pues dismenteâsi de manifature, dai pôi industriâi – viôt Osôf, Puçui, Buri, Monfalcon, San Zorç, Tor di Zuin – che a van difindûts e valorizâts cence ridusisi però a jutoris assistenzialistics che, tai agns passâts, a àn bielzà dimostrât di no funzionâ. No si pues pensâ, par esempli, di pontâ su impresis forestis che a rivin, a tetin il contribût e po dopo a van vie, lassant un cimitieri di capanons e di lavoradôrs in casse integrazion.
Une propueste di bon sens, rivade dai sindics che a àn volût costruî chescj laboratoris di Autonomie, e rimarche une robe clare e semplice: tal setôr public in primis, il localisim economic al pues jessi ancjemò une grande oportunitât; propit par chest, il sisteme di servizis publics locâi, in plen rispiet des normativis europeanis pe libare concorence di marcjât, al podarès cirî une strade che e favorissi la partecipazion des impresis furlanis tes garis publichis, in maniere di riscuvierzi la impuartance dal concet di “teritori pal teritori”. Tal stes timp, no stin a dismenteâsi dal setôr primari, dulà che la riscuvierte des tipicitâts agriculis e i percors di filiere a deventaran une strade obleade par promovi gnove ocupazion, gnûf redit e gnove economie. ❚
David Zanirato