LABORATORI DI AUTONOMIE. 1. CJARLINS, Aministrazion

Nol è par sigûr stât avonde par stiçâ la costituzion di un gnûf partît o moviment che al cjapi sù la ereditât autonomiste che in Friûl e à vût tai ultins agns pocje fortune. Ma il “Laboratori di Autonomie”, screât chest an di 12 sindics che a àn vude la colaborazion de associazion La Grame, al è di sigûr une farie di ideis e soredut une lezion di metodi: almancul secont Giorgio Cavallo, autonomist di une vite, che al à cjalât cuntune vore di atenzion il disvilup di cheste schirie di incuintris. “O ai coordenât – al dîs – il prin incuintri, chel che al veve a ce fâ cui ents locâi e la riforme dal sisteme di guvier de publiche aministrazion inte nestre Regjon. Mi è subit someât un biel mût di confrontâsi parcè che intun moment come chest ducj, dai sindics ai conseîrs comunâi, a son une vore disorientâts. I partîts talians no dan plui ponts di riferiment, ma ordins. E chest al lasse sul teritori une pussibilitât di scuvierzi gnovis situazions dulà che l’autoguvier al somee un sium plui realistic”.
Il confront sui ents locâi al à puartât a saltâ fûr “dôs posizions. Al è cui che al dîs che al covente cambiâ il sisteme, magari riscjant di no fâ dut inte miôr des manieris, ma spesseant a modificâ lis robis: invezit al è cui che al à pôre che la riforme che e sburte i Comuns a fondisi e ledi a scancelâ i municipis e lis comunitâts che a esistin vuê in Friûl”. In chest cuadri dut câs la discussion e je stade interessante e e à puartât a vignî fûr intes aministrazions furlanis doi orientaments complementârs: di une bande a son chei che a vuelin valorizâ plui che si pues la democrazie, lant a stimolâ la partecipazion dal bas cun esperiencis che a ledin a riprodusi il stîl di guvier dai bens comuns, di chê altre invezit a son chei che a pensin soredut ae eficience dal sisteme dai Comuns e no vuelin lassâsi cjapâ di nostalgjiis autonomistichis che no tegnin cont de modernitât. “No je vere dut câs che ator pes bandis dulà che i Comuns si son unîts te maniere che si vûl fâ culì in Friûl – al spieghe Cavallo – dut al è lât benon: il sindic di Cint Gianluca Falcomer al à fevelât dal esempli dal Venit dulà che no dut al funzione come tal Caposampierese, esempli che la zonte Serracchiani e presente a ducj i sindics furlans”. Ocjo aes semplificazions, duncje. Ma une robe e met ducj dacuardi: la comunitât linguistiche furlane e scuen jessi rapresentade, intune sorte di assemblee che e fronti no dome cuistions culturâls ma ancje teritoriâls. Lis Provinciis? Nissun al combatarà par lôr: ma un nivel di identitât furlane al va salvât”.
Interessante e je stade ancje la riflession sul plan culturâl dulà che la discussion “e je stade soredut su la necessitât di jemplâ la nestre maniere di pensâ di libertât e di inovazion. Par chest i modei a son par esempli Onde Furlane, radio libare che e sorevîf di passe 30 agns a dut e a ducj e il pinsîr inovatîf te musiche, tal cine e tal teatri che vuê a stan tornant a peâsi a une nature militante sul teren de identitât”. Mancul prospetivis par cumò a son sul plan de informazion che no à ancjemò la fuarce par pandi i stes concets a une platee plui largje. “Par cumò la informazion e je dome buine di comentâ la autonomie, no di sburtâle. Nus mancje une analisi serie di chescj temis e soredut une indipendence dai media furlans in tiermins di riflession”: par cumò no sin bogns di meti in pîts une rêt informative avonde largje.
Inte economie i modei invezit a son plui vivarôs: une autogjestion des risorsis e sarès pussibile, come che al dimostre il belanç de Secab presentât di Luigi Cortolezzis. “Jessi parons de nestre aghe al covente a cjapâ cussience che la energjie e je un ben che o podaressin guviernâ di bessôi. Ma parcè no vino cjolte la centrâl di Samblâc, par esempli, sul model di ce che al à fat il Trentin cun grancj beneficis par fameis e impresis?” si domande Cavallo. Il paradòs al è che vuê la uniche multinazionâl che e je in Friûl e je la Udinese. Une scuadre di balon, che dut câs e je un model di cemût che si pues stâ in pîts di bessôi intal mont globâl. ❚
Walter Tomada