La vuere e je simpri sbaliade ancje cuant che e puarte medaiis

Bicinins, ai 30 di Otubar dal 1968
Ai miei fîs Stiefin, Ane, Luzie e Titute.
Mi vês domandât di lâ, ai 4 di Novembar, vistût di fieste li dal monument, par ricevi la medaie di Cavalîr di Vitorio Venit. No larai. Mai e poi mai o larès a fâmi pontâ tal pet un premi par vê vût part te plui grande injustizie de mê vite. Us spieghi e ancje us met par scrit parcè.
◆ O ai 77 carnevâi su la schene e mi vês simpri sintût a fevelâ une vore pôc di chê che tancj di lôr a clamin “la Grande Guerra” e che par me, impen, e je stade dome un maçalizi inutil. O vevi pene passât i vincj agns e, con dut che za o morosavi cun vuestre puare mari, mi soi fat incjocâ des ideis dai iredentiscj, che e coventave lâ a diliberâ chei che a jerin oprimûts de triste Austrie, cjapâ lis sclopis e scombati par amôr de Grande Patrie. Infogonât di cheste retoriche, mi soi presentât al distret come volontari. Ce çus che o soi stât!
◆ Rivât in trincee o ai acetât il malstâ di chel lûc: il cjalt e il frêt, il pantan e i pedoi, durmî intassâts e mangjâ sbrudiots. O jeri contadin jo, usât ancje piês, no come cualchi citadin massepassût. No rivavi invezit a capî parcè che ducj o vevin simpri une malcuietece. Intes zornadis lungjis cence fâ nuie, in ducj i soldâts si olmave simpri la pôre dal prossim atac, come une spade di Damocli. Cualchidun al cirive di straviâsi cun cualchi barzalete ma cence masse efiet. No jere dome pôre, al jere propit ingôs e disperazion di vivi, savint che dome pôcs a varessin passât il prossim atac cence jessi ferîts o copâts. Al jere il gno fervôr di patriot che no mi permeteve di capî cheste ombre di pôre tal cerneli dai miei compagns, fin cuant che ancje jo o soi lât al atac cu la mê compagnie.
◆ Dopo oris di bombardaments che a fasevin sclopâ il stomi e incressi la sbisie, nus dan di bevi une robe alcoliche e al rive l’ordin. “Avanti Savoia!” al vose il cjapitani. E ducj nô saltâ fûr de trincee e cori te fumatele. Subite une granate mi sclope dongje e mi sdrume jù. Mi palpi par capî se o soi dut intîr. No ai nuie. O ringracii il Signôr. O torni a cori. Il polvar e il fum mi platin ma al è dut un sivilâ di palotulis. Dongje di me al è Berto, il fi di Mie, amì dal gno paîs. Mi passe denant corint come un sfolmenât. A colp al cole jù, come inçopedât. Mi sbassi par judâlu. No si môf. Lu volti. Al è dut insanganât, dut sforopât de metraie, ancje tal cuel. Al cîr di dîmi alc ma nol rive, al à la bocje plene di sanc. Mi cjale cui siei voi turchins e al mûr. No pues no pensâ che si jere maridât di sîs mês cun Bete di Tin che za e spietave un frut. Nol è il moment di vaî. Un aiarin lizêr al nete la fumatele e o sin sot tîr. Il gno ploton al cîr di lâ indenant par un passaç dal articolât. Une buse strete che si passe un a un. E un a un la metraie ju nete. Un maçalizi ilogjic! O cjati un pieron dulà parâmi e mi tocje viodi copâ scuasi ducj i miei compagns. No mi vergogni a dî che o ai dit dutis lis orazions di mê none. Al rive il segnâl di ritirâsi ma cui podevial saltâ fûr cence fâsi copâ? Dome cul scûr o soi rivât a tornâ te mê trincee.
◆ O podarès contâ une vore di altris brutis storiis dopo de prime ma e je stade cheste che mi à dismot dai miei siums patriotics. Tal doman o ai vude une altre sacagnade: o ai judât un zovin tenent miedi – si clamave Zuan Londar di Glemone – a assisti i ferîts. Cui cu la gjambe sbrindinade, cui svuarbât, cui cu la muse strassomeade, cui cuntune man çoncjade… e mi fermi achì. Parcè sono cussì disfigurâts? Parcè mai sono muarts ducj i miei compagns? Par un atac inutil, un massacri volût di cualchi gjenerâl, par cuissà cuale strategjie. La realtât e je une vore diferente di ce che o crodevi. La vuere e je triste, sporcje, brutâl. E da soference ai amîs e ai nemîs. Che po nemîs e je une peraule sbaliade. O savevi che i miei cusins di Cormons a scombatevin di chê altre bande, cu la monture de Austrie. Ma cemût varessio podût clamâ nemîs i fîs di mê agne Catine, furlans come me, che o ai tant zuiât cun lôr?
◆ Il tenent miedi Londar al à intivât che o vevi chescj dubis e mi à dade confidence. Planc a planc mi à contade la veretât su la vuere, di cemût che lis decision dal guvier e dal re jerin stadis cjapadis cence tignî cont des consecuencis pai soldâts e pe int. La muart di cussì tante int no contave nuie par lôr. Al baste viodi Cadorna che al mandave a murî miârs di soldâts cuintri des metraiis par cjapâ cualchi metri di tiere. Po dopo ancje di cemût che la propagande interventiste e à manipolât la opinion publiche. Mi soi sintût ancje jo manipolât e tradît. Vessio mai pensât che mai al sarès stât just fâ patî e murî cussì tante int pal interès dal re a dai gjenerâi! Ma nancje se al fos stât util ae Italie! O jeri colât te vuate di carognis!
◆ Te prime letare che o mandi a cjase, o scrîf alc de tristerie de vuere. La letare e je rivade dute scancelade de censure. Cun di plui il tenent miedi mi à visât di no fâlu plui, che al veve viodût fusilâ plui di un soldât par tradiment. O jeri partît crodint di fâ l’eroi e cumò mi sintivi come un traditôr platât. O ai scugnût lâ indenant a scombati par salvâ la scusse, cun rabie cuintri di chei che a vevin volude la vuere. Ma o soi ancje rivât a pandi ai compagns, dulà che o podevi e cun prudence, lis mês ideis di pâs. Ce sodisfazion che o ai vude cuant che ancje il pape Benedet XV al à dit di fermâ chê “inutile strage“.
◆ Alore, dal moment che no vevi podût scrivilu tes letaris dal front, lu scrîf cumò in struc: la vuere e je simpri sbaliade, inutile, e covente dome a chei che i vuadagnin parsore, e je triste e e puarte distruzion e muart. Chei che le vuelin a son sassins.
Cheste considerazion e va a plomp par ogni vuere ma pe Prime Vuere al è di zontâ alc. Chê vuere al à fat disastri soredut in Friûl, sdrumant cjasis, citâts, puints, stradis, fiscant besteam, blavis, dut che che al jere di bon, di ca e di là dal clap di confin, cun furlans in vuere par ducj i doi esercits, cun sfolâts di ca e di là, lassant dome muart e desolazion. Sigûr che chei di Rome no àn patît masse.
◆ Chê vuere e je stade ancjemò plui sbaliade parcè che e je stade volude dal nazionalisim par cjapâ dentri tieris e popui che no volevin jessi diliberâts e che a stevin ben come che a jerin. Se propit a fossin stâts problemis, la soluzion e veve di jessi diplomatiche, daûr dal principi che nissun al à di decidi di un popul cence di lui, e mai e po mai cu la fuarce e la violence des armis.
Al è par chest che no sopuarti la retoriche dai muarts in vuere par preseâ la vuere, la esaltazion dai erois par insedâ tai soldâts la braùre di azions gloriosis, la santificazion dal Milite Ignoto par indreçâ il dolôr viers i muarts impen de rabie cuintri chei che ju àn fats murî.
◆ No aceti la esaltazion des bataiis par “difindi” la patrie cuant che nissun le veve menaçade ma al è stât propit il re di Italie a declarâ la vuere. Bausiis che a van dilunc a contâ ai fruts di scuele dome par justificâ chê vuere.
◆ Un ultin cantin no rivi a parâ jù. O ai rispiet grant pai muarts in vuere, tancj a jerin miei amîs. O ai vaiût une vore par lôr e pes maris, feminis, fruts che ju àn pierdûts par simpri. No rivi a parâ jù che chei puars muarts a sedin doprâts pe propagande. La esaltazion dai monuments e dai cimitieris di vuere e covente dome par justificâ un sassinament inutil. Al è par chest che ai sticevuere no va plui ben la peraule cimitieri, che e sa dome di muart, ma e covente une peraule plui auliche, plui retoriche: “Sacrario“. Oslavie, Pasubi, Montel e une vore di sacraris par dut, fin al esempli plui imponent di propagande tal Sacrario di Redipuglia. Alore, che mi spieghin i siôrs gjenerâi: parcè che chel di Foian, o di Palme, o di Fasse, o di Nabresine, là che a son soterâts i soldâts furlans, talians, slovens, e di une vore di altris nazions, muarts cu la monture austriache, si clamino dome “cimitieri”?! Chei muarts sono di seconde categorie?
Vêso capît, fîs, parcè che no vignarai a cjoli la medaie di “Vittorio Veneto“?❚