La Val di Aoste no si plee ai partîts talians

Ai 28 di Setembar dal 2025 si son davueltis lis elezions pal rinovament dal Consei Regjonâl de Val di Aoste e lis elezions comunâls in plui di sessante comuns di chê regjon.
◆ Scrutinadis lis schedis, la Union Valdôtaine, che di pôc si è tornade a unificâ, dopo une campagne eletorâl intense davuelte in ognidun dai comuns valdostans, e je risultade il prin partît de regjon, cun cuasi il 32% des preferencis, cun daûr di se i Autonomiscj di Centri, cul 14% dai sufragjis.
◆ Il Centri diestre che e deve dongje Fratelli d’Italia, Forza Italie e Leghe no à rivât al 29% dai vôts esprimûts, puartant ae colade leghiste di 11 conseîrs a dome trê elets. Al va dit che la Leghe, di chei undis elets, e veve za pierdûts par strade, inte legjislature a pene sierade, passe metât dai siei conseîrs.
◆ La “Réunion” Valdôtaine, e je rivade a fermâ la avanzade des diestris e la Val di Aoste insiemi cu la Emilie Romagne a son lis unichis regjons dal Nord a jessi guviernadis de çampe. Al va dit che la Union Valdôtaine e rapresente dal 1945 il tiessût autonomist, federalist, indipendentist dal popul valdostan e il so sproc “Ni droite, ni gauche” (ni diestre, ni çampe) al riassum ben la volontât dai elets de UV, conservâ la proprie autonomie gjestionâl lassantsi lis mans libaris par strenzi aleancis pe gjestion politiche aministrative de regjon.
◆ Al reste purpûr il dât inconfutabil che i messaçs lançâts dai grancj leaders nazionâi lâts sù fin aes monts valdostanis par divulgâ i lôr messaçs “autonomiscj” a àn cjatât pocje atenzion intai eletôrs. In particolâr chei di Fratelli d’Italia a jerin sigûrs di sfonderâ su la onde lungje nazionâl, ma in tiere di confin valdostane no je rivade a rivâ a tocjâ l’11% dai eletôrs.
◆ La UV e il Centri Autonomist (che dentri si se e à ex conseîrs UV) a rivin ae maiorance consiliâr, 18 elets su 35. A sapontâ cheste maiorance sul crust – 18 su 17 conseîrs a saran probabilmentri, in continuitât cu la Zonte regjonâl passade – trê conseîrs dal PD, che UV e je imparintade pes elezions dal Comun di Aoste. La vision autonomiste e i messaçs inviâts ai valdostans pai prossims cinc agns di guvier de UV a son la difese dal particolarisim valdostan, la resilience culturâl declinade in dutis lis sôs formis, la lote pal ambient e la atenzion ecologjiche, un disvilup sostignibil, une atenzion particolâr al mont de scuele e al probleme seri de denatalitât che e menace tant che un clap sul dispopolament dai cjanâi valdostans, la riproposizion in forme moderne de zone francje. Dut chest par consolidâ il rûl davuelt fin vuê a difese dai valôrs che a fondin il moviment UV, leât ae resistence partesane e ae lote democratiche. La vision federaliste dal moviment e met la persone e i siei bisugns al centri de sô azion politiche. “Union Valdôtaine – al dîs il segretari Joel Farcoz – e crôt intune comunitât solidarie là che si à di lâ indenant a vivi tes “tieris altis”, che si scuen valorizâlis tant che lûcs di vite e di lavôr, par chest al covente lotâ par evitâ il dispopolament de mont creant lis cundizions miôr pes fameis che là sù a resistin a vuardie dal nestri teritori e des nestris lidrîs culturâls.” ❚