✽✽ Ti pues capitâ la zornade che ti gjave ogni dubi su cemût lâ indenant. E capite cussì cuant che za di matine al Gazzetino Giuliano tu sintis falâ in progression oride ducj i acents sui nons dai nestris paîs. Nol baste, parcè che dopo tu scomencis a contâ i servizis e tu scuvierzis trop pôc che al reste de sede RAI di Udin. Tu provis a resisti; e rive la publicitât de Regjon che, cjale ce câs, si siere cussì “…e alla sera, tutti a Trieste!”. Un biel invît, nuie ce dî, in barbe al turisim locâl. Se dopo tu pensis che l’Udin lu àn cjapât a patafs doi goi dal triestin Pobega, tu volaressis sierâ la zornade in anticip.
✽✽ Si, o schercìn, ma no crôt che al sedi tant ce ridi, parcè che al è clâr cun trope presunzion, paronance e mancjance di vision unitarie di une regjon, che si resone intai setôrs che dopo a formin la opinion publiche.
✽✽ Tropis voltis vino segnalât il pericul rapresentât dai sprocs di Promoturismo e di chel logo “Io sono FVG” che intal so aparî al singolâr al dinee cualsisedi prospetive coletive e al identifiche in chel opinionôs e presuntuôs “IO” la sole, la uniche, la talianone, citât di Triest?
✽✽ Il tricolôr al fâs sù di simpri Sant Just, ancjemò di plui cumò cuntun guvier e un partît che di cheste citât a àn fat simbul eterni di patriotisim talian. Sflamiadis che a cjaminin adun cu lis declarazions resintis dai esponents julians di FdI in cont dal tratât di Osimo e ae mai cidinade voie di “tornâ a cjapâsi” Istrie e Dalmazie.
✽✽ Cu lis perturbazions che a scjassin la Europe, cui nûi di pussibii conflits futûrs, si puedin vierzi senaris che no si podevin imagjinâ fin a pôcs agns indaûr e “imprese fiumane” in ete moderne a son ancjemò intal cjâf di tancj vecjos nostalgjics e dai lôr zovins dissepui.
✽✽ Duncje, des dôs, la uniche: o o difindìn il Friûl inte sô integritât sociâl, teritoriâl, storiche, produtive ancje a cost di someâ cjampaniliscj, o o fasìn fente che la contraposizion tra lis dôs realtâts no esisti.
✽✽ La unitât regjonâl condizionade de politiche triestine e significhe la muart de autonomie. Al significhe fâ il Friûl, no dome che provincie di Udin, une tiere indentri destinade forsit a furnî lavoranzie e servizis, no in stât di vê une sô strategjie di disvilup e di cressite.
✽✽ Difindi i siei interès al reste il nestri compit no dome pal an che al ven, ma fin cuant che al coventarà. ❚
