La produzion furlane doc al sest puest in Italie

Lu dîs il Rapuart Ismea – Qualivita
Il Friûl-VJ al è la seste “potence” taliane tal  setôr agroalimentâr certificât, un puest plui insù dal ultin rapuart Ismea-Qualivita, che inte sô edizion riferide al 2019 al regjistre une situazion positive, ancje se cun cualchi paradòs.
Te nestre regjon, di fat, pe mangjative a son regjistradis cinc produzions a Denominazion di Origjin Protete: persut di Sant Denêl, formadi Montasio, broade, vueli tergjestin e salamuts ae cjaçadore (ma chescj nissun ju prodûs), e dôs a Indicazion jeografiche Protete: il persut di Sauris e la Pitine. Tal setôr dal vin, la situazion e je plui articolade. A son 3 produzions Docg (Denominazion di Origjin Controlade e Garantide): Ramandul, Picolit e Rosacis; 9 Doc regjonâls: Friûl, Cjars, Cuei, Lusinç, Aquilee, Cuei Orientâl, Annia, Tisane e Gravis; 3 Doc interregjonâls: Prosec, Pinot grîs e Lison Pramaiôr (in piçule part tal teritori de provincie di Pordenon) e 3 Igt.
Il faturât regjonâl de “DopEconomy” al vâl 892 milions di euros (+4,9% rispiet a doi agns indaûr): une vore ben il setôr dal vin (+7,0%), là che o lin sù al cuart puest in classifiche, ma ben ancje il setôr de mangjative cuntune cressite dal 1,4% (in chest setôr o sin al cuint puest in Italie). I operadôrs a son 701. Cjalant i numars des provinciis (o ex provinciis), chê di Udin e je otave in Italie cuntun faturât di 556 milions di euros (e va sù al sest puest pe mangjative ma e je in diesime posizion inte graduatorie dal vin).
Il persut di Sant Denêl Dop al è il setim prodot certificât cun plui valôr: 307 milions di euros (+1,1%) che a puartin la regjon e la provincie di Udin al secont puest in Italie tes classifichis regjonâl e provinciâl dai prodots a base di cjar.
Te sfere dai vins, intai prins 15 prodots nol è nissun “autocton” de regjon, ma si produsin e si certifichin ancje in Friûl il Prosec (+11,3%) e il Pinot grîs che al cres adiriture dal 601%: di chescj doi vins un al è al prin e chel altri al tierç puest. Pordenon si place te posizion numar 15 (cun 201 milions di euros di valôr prodot) e Gurize te 19, cun 122 milions di euros (+10,5%).
Tra i formadis, il Montasio Dop al ocupe il setim puest pal valôr ae produzion (44 milions di euros cuntun +12,4%) e al consum (66 milions di euros, cuntune incressite dal 14,8%).
Al va ancje marcât il fat che la produzion agroalimentâr certificade (chê che dispès, cuntune retoriche autolaudative, e ven clamade des “ecelencis”) e cres in dutis e cuatri lis ex provinciis de regjon: +14% a Triest; +11% a Gurize; +9% a Pordenon e +2% a Udin.
Tal cont gjenerâl des specialitâts agroalimentârs protetis, al ten bot il primât mondiâl de Italie che,ai 31 di Dicembar dal 2019, e contave in dut 824 prodots Dop, Igp e Stg (Specialitât tradizionâl garantide) regjistrâts a nivel european sui 3.071 dal mont intîr: plui di un prodot su cuatri tra chei regjistrâts e certificâts pe lôr cualitât al è talian. I operadôrs a son passe 182 mil e il valôr de produzion al passe i 16 miliarts di euros. ❚