Il rituâl di bon auguri dai fantats si davuelç ancjemò in tancj paîs
Inte piçule comunitât cjargnele di Cleulis si celebre, in ocasion o dongje de fieste di Sant Josef (ai 19 di Març), la tradizion secolâr dal “Tîr das Cidulas”. Cheste usance antighe e je tra chês plui sintudis intal paîs: si trate de preparazion e dal tîr des cidulis, o ben tocs di len, taronts o cuadrâts, che a vegnin impiâts intun grant fûc e butâts lontan dal alt di un cuel, che a Cleulis al è clamât apont “Cuel das Cidulas”. Par solit al è len di faiâr o di peç, duncje resistent, che – une volte impiât – al à di continuâ a ardi a lunc e restâ duncje ben visibil ancje di lontan cuant che si lu lance. Il spetacul di chescj ogjets di len infogâts, tirâts lontan, intal scûr, a iluminâ il cîl stelât, al è dal sigûr alc di pardabon magjic e sugjestîf pai spetatôrs, inmò di plui se si pense a chel che al pues jessi stât il so significât simbolic inte antichitât. Il tîr des cidulis al à, cun ogni probabilitât, origjins celtichis: lis primis testemoneancis siguris a rimontin al 400 d.d.C. La ipotesi plui plausibile e je chê che e coleghe chest rituâl cul cult dal fûc dal diu Belen, divinitât celtiche dal soreli e de lûs, che in so onôr, par antîc e in dute Europe, si celebravin sacrificis e rituâi leâts ai solstizis. Duncje al è avonde intuitîf concludi che cheste tradizion e fos sul imprin un rituâl propiziatori pal rivâ de biele stagjon. A vuê al è une celebrazion che e somee cetant semplice, ma che in realtât e sotintint une cuantitât di sintiments, un coinvolziment emotîf fuart de bande di ducj i presints. Di decenis, il tîr des cidulis di Cleulis al à cjapât un significât diviers di chel religjôs e origjinari des popolazions celtichis, e cul timp al è deventât un rituâl pal plui masculin, fat soredut di fantats (chei che ur disin “Cidulârs”) che par tradizion a compagnin ogni lanç cuntune filastrocje di nature sentimentâl (dispès cuntune ande scherçose e simpri di bon auguri) indreçade in gjenerâl aes cubiis za formadis di morôs, aes cubiis “speradis”, e cualchi volte a pandin ancje un amôr tignût scuindût fin in chel moment. Fin cualchi deceni indaûr, la cerimonie e scomençave cuntun prin lanç dedicât al Sant Patron, un secont in onôr dal plevan, un tierç pal sindic, e dopo, man a man, in onôr des fantatis preferidis. La formule intal butâ la cidule e je fisse e e je cheste: “Che a vada, che a vada, chesta biela cidulina in onôr di Sant Svualt. Al nosti Sant plui venerât che da sô santitât traìni insegnament che i vin un grum bisugna in chest moment par tignî alta la fede cun onôr sot i voi vigjii dal Signôr”.
◆ Chê dai cidulârs no je une pratiche semplice, come che al podarès someâ: par fâ il lanç intal mût coret a coventin di fat une mimiche particolâr, la capacitât di dâ al cuadri o al disc di len la infogade juste, il savêlu impirâ sul baston intal mût adat par preparâlu al lanç e il savêlu burlâ par aiar cun fuarce e a ritmi cressint. Nissun nol pues svicinâsi al cidulâr intant che si prepare a fâ il lanç, parcè che al à bisugne di spazi e di libertât di moviment inte rotazion. La cerimonie e à dut câs diviersis variantis daûr de zone là che e ven praticade. L’event al cole pal plui dilunc dal solstizi di Invier (e chest al riconfermarès il leam cui rituâi celtics) ma dispès si sorepon a altris fiestis tant che il Patron dal paîs, il prin dal an, la Epifanie o la Pasche. In cualchi paîs dal Cjanâl di Guart, lis cidulis a rapresentin un mût par augurâ un bon principi dal an a dutis lis cubiis dal paîs. Il lanç des cidulis si fâs intant che il grup di cidulârs al passe di une cjase in chê altre par fâ i augurs di bon an, par puartâ un don e par gjoldi de compagnie e de ufierte di un tai di vin. Finît il lanç e il zîr, i cidulârs a van a balâ te sale sociâl o te latarie dal paîs, li che e je invidade dute la popolazion. A vuê, la tradizion antighe e à ancjemò lûc a Povolâr (ai 31 di Dicembar), Mieli (ai 31 di Dicembar), Tualiis (ai 5 di Zenâr), Comelians (ai 6 di Zenâr), Mion (ai 16 di Zenâr), Negrons (ai 12 di Fevrâr), Cleulis (ai 19 di Març), For di Avoltri (Pasche), Çurçuvint (mês di Jugn), Paulâr (mês di Lui), Ravasclêt (mês di Lui), Darte (mês di Avost), Butiee (ai 30-31 di Otubar), Pesmolêt (ai 30-31 di Otubar), Lauc (mês di Dicembar), Luvincis (ai 31 di Dicembar). ❚
