La Provincie di Udin e da ae Universitât di Udin la Cjasute dal Tresinte, che e sarà intitulade a Marzi di Strassolt

Cu la dismission des provinciis par vie de riforme che e met in cjamp lis Uti, i bens possedûts des primis a van cedûts. Par fortune, in Provincie di Udin e esist une aministrazion cuntune cierte sensibilitât. In chest sens al va il trasferiment de Cjasute dal Tresinte ae Universitât dal Friûl, che dopo e fasarà buine la destinazion di ûs in cjâf ae Societât Sientifiche e Tecnologjiche Furlane, cu la intitulazion al professôr Marzi di Strassolt. Chestis lis tapis dal iter che, midiant di chel, la Provincie di Udin e passarà la proprietât de cjase di vie Mazzini, l’edifici in venezian gotic plui vieri de citât di Udin. Calcolade l’insediament abitatîf plui antîc de citât, in origjin inte cjase dal Ttresinte a jerin a stâ artesans, tant al è che ancjemò sul tacâ dal Votcent al plan tiere al lavorave un cjaliâr. Cheste cjase e rapresente l’unic edifici restât in citât di stîl romanic, ancje se, in origjin, al faseve probabilmentri part di un grup di piçulis cjasis similis, li che a vivevin fameis di modescj artesans.
L’imobil, che nol jere doprât di aromai une ventine di agns, al jere stât acuisît de aministrazion provinciâl daspò de licuidazion dal Consorzi Universitari Furlan (Cuf).
Secont il president de Provincie di Udin Pieri Fontanini, «O din cussì biadelore compiment ae idee origjinarie dal professôr Strassolt; la realtât che lui al à fondade e varà cussì une sede dignitose, intal cûr di Udin, capitâl dal Friûl. La sô e reste ancjemò une idee ancjemò origjinâl e inovative: la valorizazion de marilenghe intal contest dai studis sientifics e tecnologjics, a conferme de dutilitât e de viertidure di une lenghe che ben si preste a jessi doprade ancje in cjamps sientifics».
«La sede e podarà jessi doprade par fins istituzionâi ma ancje tant che lûc di lavôr di dotorants che si impegnin in progjets sientifics veicolâts in lenghe furlane» secont Antonino Morassi de Societât Sientifiche e Tecnologjiche Furlane. (LPdF)