Interviste cun Fausto Zof,
scritôr, storic e insegnant di furlan
Fausto Zof, nassût a Sante Marie la Lungje dal 1939, in tancj furlans lu cognossin tant che insegnant di furlan tai cors de Societât Filologjiche Furlane. Innomenât pe sô precision e preparazion. Par vê une cerce, se no lu cognossês, si puedin cjatâ su YouTube sîs lezions di furlan inmaneadis li da La Vita Cattolica aromai uns 10 agns fa, ma simpri validis. A son tantis lis publicazions che al à dedicât ae lenghe furlane, dal prin «Lenghe furlane – elements di fonologjie e grafie», ed. Leonardo, 2001 al «Cors Teoric e Pratic de lenghe furlane», Corvino Edizioni, 2019. Tantis ancje lis publicazions su la storie furlane, la sô altre grande passion: no si pues no vê il so «Il Friûl vie pai secui» – Corvino Edizioni, 2021 – scrit cun Walter Tomada. Ancje in chest cjamp, se un al à gust di sintîlu fevelâ, al pues cjatâ su internet cinc pontadis radiofonichis pe Radio RAI 1 sul Patriarcjât di Aquilee (trasmission dal 2022).
Al à scrit ancje narative e poesie: us segnali il libri intitulât, cu la sô solite modestie, «Uns cuatri poesiis e un pâr di detulis», ed. l’Orto della Cultura, 2019.
_
Professôr Zof, mi contial dal ambient li che al è nassût?
Mi figuri che si fevelave furlan par dut. Dal sigûr. O soi nassût a Sante Marie la Lungje e si fevelave dome furlan. O ven di une famee contadine, e a pene finide la cuinte elementâr mi à tocjât di lavorâ tai cjamps cun gno pari, intant che gno fradi Galliano, che al jere plui grant di me, al podeve continuâ i studis. Ma dopo dal servizi militâr, i ai dit a gno pari che no vevi plui voie di fâ chê vite dure dal contadin, e o ai cjatât une mestre par che mi preparàs par fâ l’esam di tierce medie. A Palme o ai otignût la licence di privatist, e cun chê o ai podût jessi cjolt a vore in pueste. Par fâ un pocje di cariere bisugnave vê un titul superiôr e o ai studiât di privatist par vê ancje chel, fasint l’ultin an al Zanon di Udin a 33 agns, che o lavoravi e o vevi doi fîs, tra i fantats di cuinte.
_
Une educazion di autodidat, duncje. Aial à simpri vude passion pai studis?
O disarès di sì. Cuant che o jeri piçul, pe puaretât che e jere, dopo cene si leve te stale a scjaldâsi: cui a cusî, cui a fâ la cjalce, cui a fâ imprescj e jo mi sentavi parsore di une grepie a lei di gjeografie, storie o poesiis furlanis.
_
Cuant i ise maduride la cussience plene che il furlan al sedi propit une lenghe?
O pues dî di simpri. Imprin in gracie di mê mari che e jere une femine furlanone, e si pues dî che e jere za “furlaniste”. Jê nus diseve su lis filastrocjis par furlan, e veve sul taulin il Strolic Furlan de Filologjiche, la Stele di Nadâl, duncje e leieve il furlan. E dopo o vevi gno fradi Galliano che, intant che jo o lavoravi di contadin cun gno pari, al jere za incanalât su la cuistion linguistiche furlane. Gno fradi al à scrit uns 8-10 libris di poesiis leadis al mont contadin, e jo e lui o levin tai paîs dulintor a dî su chestis poesiis.
_
Di student dopo al è passât al insegnament dal furlan…
Ae fin dal gno percors lavoratîf mi soi svicinât ae Societât Filologjiche Furlane, in gracie di une mê coleghe che e veve fat i cors di lenghe. E cussì o ai tacât a frecuentâju ancje jo, e o ai studiât a fuart trê agns cu la intenzion di lâ a insegnâ ancje jo, vint di mestri Lucian Verone. Ae fin o ai fat un esam, e la comission e jere fate di Lucio Peressi, Edi Bortolussi e, pe storie, Gianfranco Ellero.
_
Dal pont di viste de cussience di popul furlan, di politiche, lui ce pensial?
Jo o ai soi simpri combatût par une autonomie furlane, par un svilup de culture dal nestri Friûl. Ma ancje se al è stât in passât un moment di grande idealitât, tal cors dai agns o ai capît che la politiche autonomiste e je lade planc a planc al mancul. La politiche e sarès un strument impuartant par tignî sù lis lidrîs de culture furlane, ma cumò o viôt tante debilece di chest pont di viste. Jo di persone, tai agns Sessante, o jeri impegnât in maniere direte in politiche cu la DC, o soi stât ancje segretari a Sante Marie La Lungje, e plui tart o ai seguît il moviment autonomist. Ma di cuant che o ai tacât a insegnâ furlan, mi soi dedeât ad implen a chel.
_
E tant che mestris di furlan, duncje, par lui cui sono stâts?
Dal sigûr Lucian Verone, ma dopo o volevi nomenâ ancje Franco Fabbro e Federico Vicario (che cumò al è president de Filologjiche), che ju ai cognossûts frecuentant cors di aprofondiment de Universitât dal Friûl. E cun lôr Piera Rizzolatti.
Fevelant di studiôs plui inlà cul timp, o citi Giuseppe Francescato, grant linguist furlan in particolâr il so «Dialettologia friulana» (1966), che par me al è un test ancjemò di riferiment. E no si pues dismenteâ Graziadio Isaia Ascoli cui siei «Saggi ladini», che al à fat vignî fûr de storie lis lenghis ladinis, e cun lôr il furlan.
_
Fevelant di storie, aial vût figuris di riferiment?
Chel che mi à viert la strade de storie al è stât simpri Lucian Verone, che al insisteve che in plui de gramatiche si veve di savê ancje la storie furlane. Po dopo un riferiment al è stât Gianfranco Ellero, che lu ai vût ancje di insegnant, e Tito Maniacco par vêlu cognossût di persone e let lis sôs oparis storichis. In plui mi plâs ricuardâ Pio Paschini, Pier Silverio Leicht, Gian Carlo Menis, Pieri Piçul e Gianfranco Ellero che a àn dât lustri al nestri Friûl e che la lôr produzion storiche bondante e à rapresentât par mê une buine font di studi.
_
E cualchi mestri tal cjamp de leterature?
Jo o ai lavorât une vore sui scrits di Josef Marchet, po dopo o citi Catarine Percude, Pieri Çorut, o ai let un grum di poesiis di pre Meni Zannier che lui ai frecuentât tant.
_
E un mestri ideologjic, se lu à vût, cui podaressial jessi?
Chel che mi à dât une idee plene di Friûl al è stât Lucio Peressi, che al è mancjât di pôc. Po dopo ancje Gianni Osualdini e il professôr Giovanni Frau mi àn dât tant cun lis lôr riflessions.
_
Cualchi volte te rubriche o fevelìn ancje di musiche: i vegnie iniment cualchi figure furlane significative?
Tant che musiche sacre o classiche Oreste Rosso e Jacopo Tomadini. Tal cjamp de musiche lizere Dario Zampa e Beppino Lodolo.
_
Ise une figure vie pe storie che lui al nomenarès in particolâr, cualchidun che i à dât lustri al Friûl?
Al merete jessi memoreât Josef Marchet pe sô produzion linguistiche, leterarie e storiche. Su chest personaç o ai fate une ricercje aprofondide che mi à permetût di realizâ une interviste imagjinarie po publicade de Leonardo di Pasian di Prât («Interviste imagjinarie a Catarine Percude, Josef Marchet e Pier Pauli Pasolini», ndr)
_
Ultime domande, un autôr o opare che a varessin di jessi valutâts di plui.
Il romanç di Carlo Sgorlon «Ombris tal infinît», l’ultin che al à scrit. Lu ai adotât par doprâlu tal ultin cors di lenghe che o ai tignût: o fâs simpri un pôc di gramatiche, ma ancje leture e traduzion. E tante storie. ❚
…………………………………………………….
FOCUS. Il personaç
Galliano Zof (Sedean 1945 – Udin 1997)
Nassût intal 1933 a Sante Marie La Lungje, prin di cuatri fradis, al jere laureât dôs voltis, in leterature e in filosofie. Al à insegnât aes mediis te Basse par deventâ preside a Gonârs, Manzan e San Zuan. Al è autôr di tantis poesiis in lenghe furlane, publicadis in diviersis racueltis. Al scomence a scrivi intai agns ’60 e al è stât fondadôr intune cun Mari Argante e cun pre Domeni Zannier dal grup leterari La Cjarande. Di lidrîs cristianis profondis, dopo i prins componiments leâts al mont dai afiets e ae memorie, intai agns ’70 il regjistri di Zof al cambie e si volte intun sintiment fuart di justizie sociâl, deventant il cjantôr de “contadinance”, dai puars, dai ultins. Al è ancje autôr dal drame teatrâl «Lunis in cercli», vincidôr di un dai tancj premis leteraris de sô cariere. Tra i socis fondadôrs dal Istitût pe lenghe e culture furlane Achille Tellini di Manzan, al à publicât ancje studis di gramatiche e fonologjie dal furlan e studis su lis tradizions e la culture furlanis. Fra lis sôs oparis di poesie plui impuartantis a son «Pan cence levan», «Contadinance”, la racuelte “Flôrs”, “Spire e muse”, “Cjant forest”. ❚