La musiche come resistence al narcisisim de modernitât: Narci Scisma

Al è jessût il gnûf album dai Autostoppisti Del Magico Sentiero: “Narci Scisma – La Lobotomizzazione del Risveglio”. Publicât ai 13 di Dicembar dal 2024, l’album al ten dongje tredis tocs che a esplorin tematichis atuâls come la comunicazion, la tecnologjie e la identitât, frontant il narcisisim e la manipolazion mediatiche intun mont in crisi. Dut chest messedant free jazz e musiche eletroniche di avanvuardie.
◆ La musiche dai Autostoppisti Del Magico Sentiero le cognossìn za ben e tai agns no à mai molât di stupînus. Il progjet al nas tal 2018 di Fabrizio Citossi, fondadôr dal coletîf, e si inricjìs di colaboradôrs come Franco Polentarutti, Martin O’Loughlin e Marco Tomasin. Cun plui di sessante colaboradôrs, fra chescj jazziscj come Mirko Cisilino e Marco D’Orlando e artiscj come il cjantautôr Toni Bruna e il scritôr Andrea Balzola, il grup al cree un album che al font folk, jazz, eletroniche e poesie. La produzion, realizade in colaborazion cun Slou e Estensioni Jazz Club Diffuso par New Model Label, al è un mix di sonoritâts istintivis e improvisadis.
◆ Il grup al definìs la sô musiche come «folk sperimentâl improvisât», un collage che al riflet su la finte sigurece sociâl e sul narcisisim. Citossi al conte che l’album al è un invît a resisti aes sorestruturis che a sburtin l’individui viers un vueit di cussience, dulà che si domande: «Ma cemût mi soio ridusût?». Il disc al devente cussì une critiche ae societât de aparence e dal autocomplasiment, un «infier narcisistic» che al tocje temis di comunicazion e ipocrisie autoreferenziâls.
◆ Il coletîf, che si è evolût tal timp cjapant dentri musiciscj come Alessandro Seravalle e Stefano Tracanelli, al è stât influençât di artiscj come Bob Dylan, Lucio Dalla, John Coltrane, e altris, esplorant il blues, il jazz, il funk e la cjançon di autôr. La colaborazion cul discografic Govind Khurana e à viert gnovis oportunitâts, permetint al grup di rivâ a un public plui grant. Ogni conciert dal vîf pai Autostoppisti al è come un moment sacri di scambi emotîf, dulà che a mantegnin un leam diret cul public.
◆ L’album a pene jessût nol è dome une colezion di tocs, ma un manifest che al denunzie la fragjilitât de identitât intun mont simpri plui dominât dal narcisisim e de superficialitât.
◆ Il prin toc, White Cat Happening Revolution, al tache cuntun ritmi pulsant, che al met il scoltadôr devant di une domande esistenziâl. Il Peyote è una benzodiazepina naturale al puarte une fusion di melodiis e ritmis che a crein un sens di inzirli. Beat Vipassana al esplore il confin tra musiche e meditazion, infin Amisulpride Overdrive al trasmet une energjie vitâl potente.
◆ Narcyswing a cottimo al è un manifest di autocomplasiment, criticant l’egoisim de societât moderne. Nuovo ordine provinciale al messede lis melodiis dissonantis e finis, cjapant dentri la essence di un mont in riviel. In Un purgatori di fibre otiche a metin dongje la tecnologjie e la spiritualitât, tant che Lettere a une acciaierie mai nate al riclame a disilusion e sperance.
◆ Il Fentanyl allevia lo stress al esplore temis delicâts cuntune sensibilitât che e font poesie e pragmatisim, invezit La lobotomizzazione del risveglio, che il titul al è in part chel dal album, e riflet suntune realtât schizofreniche. Il delirio impostoci si presente come un berghel di alarmi e Ned Ludd VS I.A. al fronte il conflit tra tradizion e inovazion. Infin Blues immerso nell’iperico al è un omaç a sonoritâts classichis, cun blues e influencis modernis.
◆ “Narci Scisma – La Lobotomizzazione del Risveglio” al devente cussì une riflession su la epoche contemporanie, dulà che la musiche e je un strument di espression e resistence.
◆ Ancje la cuviertine dal album e je alc e ce. Si inspire di fat ae fotografie storiche di Lee Miller te vascje di bagn di Hitler, tornade a interpretâ di Luca A d’Agostino intune version “Situazioniste” che e cjape dentri il musicist Franco Polentarutti. Chest riclam visîf al simbolize in maniere perfete i temis dal disc: propagande, marketing e falsetât.
◆ Ce dî, il futûr dal grup al previôt come simpri progjets ambiziôs, come un gnûf album che al met dongje gjenars musicâi tant diviers fra di lôr (musiche di cjamare, eletroniche e poesiis dal Nûfcent), ma o spietìn fin al 2026 e intant o stin daûr dai gnûfs progjets cun tante passion. Lait su lis plateformis digjitâls par scoltâ e comprâ l’album, ma soredut no stait a pierdisi un lôr conciert. Restait inzornâts su lis pagjinis social di chest grup che si pues dîlu, a son un “Scisma”. ❚