La mostre dedicade al liutâr cjargnel Gio Batta Morassi

Tra i events di ponte di
Risonanze Festival e je la mostre, che e vignarà screade sabide ai 14 di Jugn aes 18.00, tal Palaç Venezian di Malborghet, dedicade al liutâr Gio Batta Morassi. Il “Mestri dal len”, l’artesan che par prin al à discuviert lis proprietâts unichis dal peç di risonance. Lui, calcolât tra i massims liutârs dal mont contemporani, come che e conte ancje la enciclopedie Treccani, fondadôr de Associazion Liutarie Taliane a Cremone, ven a stâi la patrie dal violin. E di violins, come che si podarà amirâ inte esposizion dedicade, a ‘nd à fats di maraveôs, tant che grancj musicist di dut il mont i tegnin a vê intes lôr colezion un strument “Morassi”. E la sclese no va lontane dal çoc, stant che ancje il fi Simeone e i nevôts Giovanni Battista e Giulio, che a saran presints a Risonanze e che a contaran la mostre, a son mestris ricognossûts inte costruzions di struments musicâi a arc. E cun lôr e sarà ancje la Red Dot Baroque di Singapor che e fasarà sintî i sunâ lis lôr oparis.
◆ Une grande famee chê dai Morassi. E lui, Gio Batta, nassût a Cedarcjis tal Comun di Darte tal 1934, trasferît zovin, tal 1942, a Cjamparòs, cui prins studis a Tarvis, come nissun altri al à intuît il tesaur dal len de Valcjanâl. Diplomât tal 1955 inte scuele internazionâl di liutarie di Cremone, che al à podût frecuentâ in graciis di une borse di studi, al à savût prest fâsi ben valê e ben volê inte citât dai violins. Al à frecuentât lis buteghis di Peter Tatàr, Giuseppe Ornati, Ferdinando Garimberti, cjapant sù il mistîr e deventant ancje lui insegnant di laboratori, fin cuant che al à fondât e vuidât par tant timp la Associazion Liutarie Taliane, une vere istituzion di innomine mondiâl; un ent che al sarà presint ancje a Risonanze Festival cun diviersis rapresentancis e struments unics e di valôr sigûr.
◆ In particolâr, al è stât intai agns Otante che Gio Batta Morassi al à vude la intuizion gjeniâl dal peç di risonance, e la bravure di verificâle, metile in opare e, di fat, fale sunâ. Compliç l’amì di une vite, il boscadôr titulâr di une laboratori di marangon a Valbrune e grant cognossidôr dal len, Bruno Deotto, sparît tal 2015, che chest an a colin i dîs agns de sô muart.
◆ Insiemi, lavorant il len ognidun daûr des sôs competencis e sensibilitâts, ridusint al minim il scart e rivant a permeti al materiâl di rindi simpri miôr, rafinant la materie prime al pont di trasformâle in len che al sun, a son rivâts adore a dâ valôr massim a un patrimoni inestimabil.
◆ Inte mostre tal Palaç Venezian si varà il plasê di amirâ i miôr manufats di Gio Batta Morassi, oparis mestris par cualitât di sun e par elegance di forme. Disparît tal 2018, il Mestri Morassi al jere une vore cognossût ancje in Gjapon, là che al à ricevût tancj premis e ricognossiments pe sô ativitât. Tra l’altri, tal 2015, la Universitât dal Friûl i à conferît la lauree magjistrâl ad honorem in Dissiplinis de Musiche e dal Spetacul, e in chê ocasion al à tignût une lezion pardabon interessante cul titul: “Il savê fâ il liutâr: de cognossince dal len ae tradizion dal strument musicâl”.
◆ Gio Batta Morassi, un personaç ilustri dal nestri Friûl. ❚