La mont Cjanine e je une des plui nevosis des Alps

La mont Cjanine e je une des plui nevosis des Alps: li dal ripâr Gilberti a son colâts in medie 10 m di nêf ad an, intai ultins 11 agns. Propit par chest, cuant che i Istâts a jerin ancjemò avonde frêts, al veve rivât a disvilupâsi culì un glaçâr di rimarc, considerant ancje la cuote relativementri basse (2300m), che al rivà ai siei massims ae fin de Piçule Ete Glaciâl (1300-1850 cirche) e che cumò al è in sostance disparît. Chestis a son lis resons che a àn puartât la Societât Meteorologjiche Alpinoadriatiche, di sede a Udin, a meti sù une cunvigne sui glaçârs des Alps Orientâls propit a Nevee, da pît de mont Cjanine, cu la colaborazion dal Parc des Prealps Juliis e des autoritâts locâls. Cheste conference, moderade de dotore Giulia Genuzio, e jentrave inte suaze de prime Zornade Mondiâl dai Glaçârs, ai 21 di Març dal 2025.
◆ Al à vierzude la cunvigne il president de SMA-A, il dotôr Renato Roberto Colucci dal Istitût di Siencis Polârs dal CNR, che al à presentade la panoramiche dal riscjaldament globâl che al puarte ae fusion dai glaçs. Daspò, il dotôr Jure Tičar, glaciolic e speleolic dal Istitût Gjeografic Anton Melik di Lubiane (part dal Centri di Ricercje de Academie Slovene di Siencis e Arts), al à presentade une relazion une vore detaiade su lis cundizions dai glaçârs de Slovenie. La Slovenie, dutun cul Venezuela, e je stade il prin paîs dal mont a pierdi ducj i siei glaçârs intal 2024. Il so glaçâr plui innomenât al jere chel de mont Terglou (Triglav), logât a cirche 2500m sot de parêt Nord Est, che al veve une aree di plui di cuarante etars ae fin dal secul XIX e che aromai si è ridusude a mancul di un etar. Al va dit che un glaçâr nol ven calcolât muart cuant che e sparìs dute la glace, ma za cuant che la pocje glace che e je restade no si môf plui, o ben cuant che no si viodin plui sclapons. Cun di fat, la assence di moviment e vûl dî che no si forme plui glace gnove: e je la pression de glace gnove che e sburte injù chê viere. La glace residue di un glaçâr muart e cjape il non di glacionevât (par talian glacionevato). Stesse sorte e je tocjade al glaciâl de mont Skuta, a 2100 metris cirche. Dut câs, chest ex glaçâr al à ralentade la sô fusion parcè che si cjate dentri di une concje che e cjale a Miezegnot, parade de ombrene dai crets.
◆ Intune situazion dal gjenar al è ancje il glaçâr Eiskar a Nord de Crete de Cjanevate (o Kellerspitzen), a 2200 m. Lis osservazions su chest glaçâr a tacarin intal 1897 cun Olinto Marinelli e a forin puartadis indenant cuntune cierte regolaritât. Za agns la ativitât di osservazion e je passade di man ae famee Hohenwarter. In dì di vuê il dotôr Gerhard Hohenwarter, meteorolic e climatolic dal GeoSphere Austria, le puarte indenant cun braùre e costance come opare di volontariât dentri dal program di misurazion dal Österreichischer Alpenverein, poiantsi sul jutori di famee e amîs. Il ritîr dal glaçâr Eiskar al è ralentât rispiet ai agns ’90 parcè che cumò dute la glace si cjate ben dentri de ombrene de concje; cun di plui, al ven ancje alimentât di lavinis dai crets dulintor.
◆ Chest efiet al è cetant plui evident pal unic glaçâr restât intes Alps Juliis, chel Ocidentâl dal Jôf di Montâs, tacât a studiâ di Ardito Desio e in dì di vuê tignût di voli dai professôrs Federico Cazorzi e Sara Cucchiaro de Universitât dal Friûl, dutun cui lôr colaboradôrs. Il glaçâr al è a 1900 m, al è il plui bas des Alps e al à ancjemò une superficie di 7 etars. Al è alimentât di lavinis che a vegnin jù di crets alts 800 metris, al è cuasi simpri inte ombrene e al è sostignût di un arc di morenis.
◆ Di ultin, il dotôr Andrea Securo, de Universitât di Vignesie, al à presentât i risultâts des osservazions sui glaçârs des Dolomitis: i 9 glaçârs studiâts a taponavin une aree di plui di 4 km2 intai agns ’80 e cumò si son framentâts e ridusûts a mancul di 2 km2. Il lôr spessôr al è lât jù di 28,7 m in medie inte stesse dade.
◆ La conference e je stade compagnade des musichis dal progjet Reson-Ice, di Pietro Tonchia e Paola Fattori, composizions di Giovanna Pezzetta, ispiradis ai sunôrs des glacis e des aghis dal Montâs. ❚