✽✽ Lis manifestazions che a àn invadût lis placis a poie dal popul palestinês – o miôr cuintri dal gjenocidi metût in vore dal guvier israelian a dam de popolazion civîl di Gaza – a àn gjoldût de presince di une vore di zovins. E je stade une rispueste spontanie e massive, risultât di une indignazion morâl, un dî di no ae prevaricazion violente e al lâ al mancul di cualsisedi ombre di umanitât. Dificil capî parcè che dome devant di cheste vuere e no di altris, dome devant di chestis soferencis e no di altris, e sedi partide cheste suste di indignazion e di proteste. Ma nol è chest il pont. I ultins esemplis di mobilitazion spontanie a rimontavin a cualchi an indaûr e a vevin il rimpin su la cuistion ambientâl. E jere la figure di Greta Thunberg, la eroine di une proteste che dopo si è risolte in mil riui, che dut câs e à lassât une olme impuartante inte cussience dai zovins.
✽✽ Cetant di chel si è viodût intes placis in chestis ultimis setemanis mi à fat tornâ ae memorie la fin dai agns ’60 e lis protestis cuintri la vuere in Vietnam. O crôt di fat che ce al à stiçât i corteus a pro de Palestine al sedi tant simil a ce che al jere vignût sù intal anim di milions di zovins dapardut intal mont di chei agns: stâ de bande dal debil devant de paronance e de violence dal fuart. Sigûr un messaç cristian, ma ancje laic, puartadôr di chê umanitât che e somee pierdude devant dal mont contemporani.
✽✽ Chest dismovisi des gnovis gjenerazions, che definî politic mi somee malmadûr, al puarte a une riflession profonde ancje par dut il mont autonomist che, propit in chei agns ’60 e cul moviment sucessîf dal ’68, nol à savût cjatâ un puest tant che bon interlocutôr dal mont zovin, pûr jessint nassût e jessint il risultât des lotis studentescjis pe Universitât furlane.
✽✽ Di consecuence in Friûl nol è capitât ce che invezit al è sucedût in Catalogne, intal Paîs Basc o in Irlande, là che la cussience identitarie no vignì mai mancul e i zovins a son deventâts un element fondamentâl inte lote pe autonomie. Intal Stât talian cualchi segnâl in chest sens si à verificât dome in Sardegne.
✽✽ Ve alore, presentâ ae nestre zoventût un progjet, definìnlu pûr un sium, di autonomie reâl, di autoguvier, di rispiet dai dirits, intune prospetive ideâl di pâs e progrès al varès di jessi calcolât impuartant. ❚
