LA INTERVISTE. I côrs musicâi: une biele tradizion furlane

A son lis realtâts che a rivin dulà che lis istituzions a mancjin. A davuelzin une funzion sociâl, in particolâr tai piçui paîs: vêrs ponts di riferiment e dal stâ insiemi. «Cence dismenteâ che la coralitât furlane e je rivade adore a disvilupâ risultâts professionâi impensabii», al sclarìs Franco Colussi, president regjonâl de associazion che ju coordene, la Union societât corâls dal Friûl-Vignesie Julie.
Il sodalizi al tire dongje cirche 320 tra côrs, coruts e corâls. Al à la sô cjase a Sant Vît dal Tiliment (Pn) e al è dividût in cinc associazions «territoriâls», cuatri di lôr definidis a nivel provinciâl: Usci Gorizia, Usci Pordenone, Usci Trieste e la Union societât corâl furlane par Udin. E je sore provinciâl, invezit, la Zskd/Uccs, ven a stâi la Union dai Circui Culturâls Slovens. L’Usci F-VJ (che al fâs part de Feniarco, la Federazion Nazionâl taliane Associazions Regjonâls Corâls) al è un organisim di secont nivel, lis funzions operativis a son delegadis localmentri.
Sot di chest cjapiel, si indrece la impuartante funzion di conservazion, promozion e valorizazion dal patrimoni corâl dal Friûl-VJ. Il president nol dinee che un element caraterizant al sedi propit un filon popolâr. Un denominatôr comun. «Te realtât dal Friûl storic no nd è un côr, ancje specializât in particolâr intun tip di cjant – al dîs Colussi – che nol vedi in repertori une vilote o une cjantose in marilenghe. Il cjant popolâr furlan al è plui vîf e vivarôs di ce che si pues imagjinâ». Lu dimostrin lis diviersis rileturis che a son dadis dai grups ai tocs musicâi dal passât. Si cjate ogni sorte di propueste: rangjaments in clâf moderne e ricercjis antropologjichis par no pierdi un patrimoni, magari di paîs. «A esistin coriscj che a àn racuelt testemoneancis par che no ledin pierdûts i cjants dai vielis. In font, sul imprin o vevin a disposizion dome il materiâl racuelt de Filologjiche tai agns Vincj e Trente», al zonte il president de Usci Fvg.
In font, il parcè che chestis realtâts a àn di jessi a lôr volte prudeladis, lu dimostre l’impuartant lavôr, salacor cidin, che a davuelzin in volontariât. No cate cualchi finanziament che al rive dai Ents provinciâi, a son i stes coriscj a auto tassâsi par dâ un franc al mestri che al dirêç o par gambiâ la divise. Cualchidun di lôr al zire il mont in concierts e rassegnis e dispès il «cachè» nol cuvierç lis spesis. Si contin almancul 4-5 grups corâi par ogni provincie furlane di nivel ecelent, nomenâts ancje tal forest. «Par caritât, cence fâ nons – al sclarìs Colussi –, guai a inviâ gjelosiis».
(Oscar Puntel)