La siore Susane di Çarvignan no veve plui tantis fuarcis e aromai no rivave a fâ lis robis che e faseve un timp.
Par chest e veve tignude une uniche gjaline. Le veve di tancj agns e si jere afezionade a jê tant di vêi dât il non di Ninine.
◆ Ninine e jere tant di compagnie pe siore Susane.
Intun dopodimisdì di soreli cjalt, la parone e jere lade a butâsi sul jet in cjamare sô e la gjaline e jere lade a fâ un pisulut parsore dal gjalinâr.
◆ Dut un colp, Ninine e vierzè i voi parcè che i jere parût di sintî a movisi alc.
E veve propit nasât just! Cidine cidine e jere rivade fin li sot une faìne pericolose.
◆ A colp, la gjaline cuntun svol e le a metisi plui in alt, tant par jessi plui tal sigûr.
“Ninine, âstu sintude la biele gnove?” i domandà svelte la faìne.
“No, jo no cjali mai la television,” i rispuindè la gjaline. “Di ce biele gnove fevelistu?”
“Ducj i animâi dal mont a àn decidût di fâ la pâs, di deventâ grancj amîs, di volêsi ben e di rispietâsi un cul altri. Duncje, nissun animâl al varà di vê plui pôre che une altre bestie i fâsi dal mâl. Âstu capît? Tu puedis dismontâ jù cence nissune pôre” i contà furbe la faìne.
“A mi a mi pâr che e sedi une biele gnove, ma a mi mi plâs restâ ca sù,” i disè la gjaline.
“Ma no, ce stâstu a fâ li par aiar, ven jù che o fasìn fieste!” e insistè la faìne.
“Di ca sù o rivi a viodi ducj i moviments. Par esempli cumò o viôt che a rivin dongje trê bruts cjanats…”
A pene sintût a dî chê robe, la faìne e cambià muse e si metè in pose pronte par scjampâ.
“Ce fâstu?” i domandà la gjaline. “Di cui âstu pôre se vuê e je stade fissade la pâs fra dutis lis bestiis dal mont?”
“Sì, e je vere.” i rispuindè dute sfolmenade la faìne. “Ma o crôt che ai cjans no i sedi ancjemò rivade la gnove!”
E e scjampà vie come une saete, plene di fufe. ❚
La gnove de pâs
Roberto Meroi
