LA FABRICHE DAI… LIBRIS. I libris te valîs

O sin aromai in plen Istât, e par tancj e je rivade la pussibilitât di polsâ un pôc. Parcè alore no profitâ de ocasion par leisi alc par furlan? Provìn a viodi se si rive a dâ cualchi consei di leture, cirint intes oparis dai ultins agns chês che, magari cuntun fregul di fature, si vessin di rivâ a cjatâ tes librariis, almancul inta chês che a àn un ninin di snait.
Feriis al mâr
Tachìn cun chei che a van al mâr. Ce isal di miôr, su la splaze sot dal ombrelon, che cualchi biele storie di intric e investigazion? E alore si podaressin lei lis contis di Zâl par furlan, la antologjie des oparis presentadis tal omonim concors leterari di Spilimberc. Se po no si à vonde, la sielte e cole sul biel noir di Nardin Il Cop (premi Sant Simon 2007).
Vacancis in mont
Par chei che invezit a àn miôr là a cjaminâ in montagne o dut câs a preferissin la trancuilitât, il cidin o i puescj isolâts, la leture conseade e jê dal sigûr Niari di Fulvio Redkaa Romanin. Intant par imparâsi un pôc di furlan di Fors di Avoltri e po par vê une vision par sigûr fûr di cjâf de Cjargne.
Pensant a un libri cussì mat al ven subit iniment il Donald dal Tiliment di Morat (che cu la montagne al à pôc a ce fa), invezit il Gilez di Marchetta almancul al comence e al finìs su la nêf (e cussì o vin nomenât i doi cult-book furlans di chest inizi dal tierç milenari).
Tal forest
A cui che al va tal forest e che al è simpri curiôs di viodi robis gnovis, si podarès conseâ cualchi biel fumut. La Fortuna di Guido Carrara, e je une vere graphic novel che nus puarte de marine di Sant Zorç aes planis dal sud Americhe, e che e pues jessi une buine ocasion par tacâ a fevelâ un pôc di cocoliche argjentin. Cui che invezit al proviôt di vê bisugne di fâsi cualchi ridade par passâ il timp, in spiete di avions o trens ritardataris, al varès di puartâsi daûr i jurassics Gnognosaurs di Dree Venier.
A cjase
A cui che nol larà tant atôr e al restarà a cjase o consein il gustôs Manuâl critic dal ort di Montello, ancje se si à di disi che dopo vêlu let no si rive plui a cjalâ un strop di tiere cu la stesse inocence  che si veve prime. Dongje o podìn zontâ altris biei libris. L’ambiziôs Ombris tal infinît, romanç postum di Sgorlon, al podarès stiçâ a frontâ i titui de golaine des ristampis dai classics de Leterature furlane (dal Pilustrât di Colussi ae Cjase Dalban di Forte, de Pauluzzo ae Mazzon a Delchi Tirel). Il plui moderni Checho Tam e il so Scûr di lune o lis svariadis contis de riviste La Comugne a podaressin ae fin jessi il stimul par cirî alc altri e magari par continuâ a lei par furlan.
Maurizio Biasizzo