LA FABRICHE DAI… LIBRIS – CONTECURTE. Il cjâf inte sachete e Narcissus

IL CJÂF INTE SACHETE
di Dree Venier
O dismonti dal autobus e mi invii pal viâl viers l’ufizi, tignint lis man te sachete, batint il tac.
Al è un gnô mût di fâ carataristic: mi plâs vê lis mans tal cjalt. O soi un che al patìs avonde il frêt e di fat a voltis o met te sachete adiriture dut il braç, o un pît, o une gjambe, o il cjâf. Cuant che o fâs cussì la int pe strade si volte a cjalâmi scaturide, schifade o spaventade. Pazienze: o ai di stâ comut jo.
Dome stâ cu la man te sachete sierade cui dêts a pugn no mi plâs: strenzilis a pugn mi somee un simbul di violence, no sai… mi da fastidi. Savêso, jo o ai fat l’obietôr di cussience, ma migo par sghindâ il militâr: propit par convinzion inte noviolence.
A proposit di cussience: ogni tant o met te sachete ancje chê, tignintle li platade.
Ma no capìs parchè che cuant che o ai la cussience te sachete, pe strade nissun si volte.
NARCISSUS
di GIANFRANCO PELLEGRINI
E steve dut il dì denant dal spieli.
E tacave di matine, a pene jevade. Si slissave i cjavei, ju petenave, si piturave. A jerin ciertis zornadis che e cambiave dôs, trê voltis la petenadure. E jere buine di fâsi lis strecis e un moment dopo, mudât il vistît, lis disfave, tirant sù i cjavei intun cocon fof.
Il spieli al cjapave dut il ricuadri dal barcon, taponantlu. Inte cjamare no jerin altris barcons. Pe lûs… ben, a jê i bastave une cjandele.
Une dì, no si sa se par vie di un concul tirât de mularie o di un colomp che al jere lât a sbatii intor, il spieli al jere lât in mil fruçons e cun lui la imagjine rifletude di jê.
Disperade e cirì di tornâ a fâ sù la figure, provant a meti adun lis sclesis di veri e tentant di tacâ scaiis di voli cun tocuts di cee, sbrendui di nâs cun cjantons di bocje. Nuie di fâ! La fantate no tornave plui!
Alore e pensâ di metisi jê tal so puest, te suaze vueide dal spieli.
E montà sù sul antîl dal barcon, viert.