✽✽ No stin a platâsi daûr di un dêt: al esist vuê un sens di aviliment difondût che al tocje cetancj che a àn a cûr la cuistion furlane. Al imbombe soredut chei plui anzians, deludûts dal fat che ogni volte che al pâr rivât cualchi risultât, in maniere puntuâl a tornin dongje vecjos ostacui, come se in ducj chescj agns nol fos cambiât nuie.
✽✽ L’ultin esempli, magari cussì no, al rive di une assemblee dal Pat pe Autonomie là che a jerin stâts invidâts ancje grups di personis che in cualchi maniere a son dongje ai temis gjenerâi puartadis indenant di chel partît inte citât di Udin. Devant di une relazion di Stefania Garlatti-Costa tignude par furlan, dal dut logjiche e naturâl viodût il so rûl di delegade aes lenghis minoritariis intal Consei comunâl, di bande di cierts e je rivade la clamade di fevelâ par talian. O zuri che mi someave di jessi tornât indaûr di secui: al esisteve ancjemò cualchidun che, a pet dal dirit di esprimisi inte lenghe mari, garantît ancje di leçs di tutele, si ingnervosive e al protestave. Dificil pensâ di podê mantignî rapuarts “amicâi” cun cheste disposizion di spirt. Une osservazion dute politiche: se intal sisteme eletorâl di cumò, lis aleancis a coventin par rivâ a cierts risultâts, al pâr ancjetant clâr che chestis no puedin vê fondis sul ecuivoc e su la ambiguitât. Se cierts obietîfs a puedin jessi condividûts, sot di ogni pussibil acuardi al sta il ricognossiment di un principi identitari fondamentâl: il popul furlan al esist cu la sô storie e la sô culture, come che e esist une tiere che si clame Friûl, di là des definizions aministrativis che si si vuelin dâi.
✽✽ Si clame dirit ae autodeterminazion, un concet che al vâl a nivel internazionâl par ducj i popui e che, intal nestri câs specific, al segne un agâr di condote, un troi di tignî ben presint, ancje cuant che cualchidun al cambie lis indicazions dal navigadôr satelitâr.
✽✽ A cui che al calcole utopistiche cheste prospetive, o varessin di visâi cemût che la situazion dramatiche di cumò, lis vueris che a son daûr a insanganâ il mont contemporani, a nassin dutis propit de assence di chest ricognossiment, si crein dal mancjât rispiet di chest dirit.
✽✽ Vincìn il disconfuart par chescj episodis alore, sigûrs, cemût che o sin, di trop juste che e je la nestre lote. O savìn che e sarà la cuistion e sarà dificile e lungje, forsit plui lungje di ce che o pensavin, ma al è simpri stât cussì.
✽✽ “Si scuen cjapâ dentri i zovins” a disin in tancj ancje tra di nô.
✽✽ Ur ai rispuindût simpri che lis gnovis gjenerazions a jentrin in cjamp bessolis cuant che si convincin di podê deventâ alc e jessi protagonistis di un progjet.
✽✽ A nô autonomiscj, ai “furlaniscj” che no si vergognin di chest apelatîf, o dîs che dimostrâ che chest sium al esist e fâlu deventâ realtât al è compit di ducj. ❚
