La aga no ni divît…

Fat impuartant la fusion des dôs bancjis di Credit Cooperatîf Friulovest Banca e Bancater. A àn decidût, a maiorance grandone, di unîsi intun unic istitût bancjari: Banca 360 FVG. Il non nol è il massim, soredut parcè che e mancje la liniute tra F e VG. Ma, di là dal fat formâl dal non che dut câs al à une cierte impuartance, la operazion nus pâr di rilêf politic assolût.
◆ Pe prime volte dal Fevrâr dal 1968, cuant che e je stade istituide la Provincie di Pordenon, dividint il Friûl storic – come che al jere capitât un secul e mieç prime cul mandament di Puart, zontât ae Provincie di Vignesie – si è lâts in cuintritindince. Fin cumò la pôre di Pordenon di jessi mangjât di Udin al à fat nassi colaborazions cuintri nature. Pensait dome a Confindustria Alto Adriatico… Lis bancjis di ca e di là dal Tiliment invezit, par une volte, si son metudis adun par frontâ miôr i marcjâts finanziaris. La globalizazion imperant e pretint economiis di scjale e duncje la fusion e va in chest sens. Ma no podìn no viodi ancje un passaç politic pesant. Finalmentri il Tiliment nol divît ma al unìs, bancjis ma ancje infrastruturis economichis. Pensait dome a chel cuadrilatar di ca e di là da la aghe che al cjape dentri Spilimberc, San Denêl, Codroip e San Vît dal Tiliment: un distret rurâl di dut rispiet, cu la massime espression de cooperazion, cui Vivârs di Raussêt, cu lis cantinis di San Zorç de Richinvelde e Cjasarse, cul consorzi dal persut, cu la associazion dai arlevadôrs, cui riordins fondiaris dal Friûl di Mieç, cu la DOP dal formadi Montâs… Insume, la magna pars de agriculture regjonâl. Lu fasìno pesâ tai progjets di svilup de Regjon? Rivìno par une volte a decidi culì lis strategjiis almancul dal setôr primari? Sino in grât come bancje di parturî une classe dirigjente autonome e autoctone che e cjati la strade juste par rinfuarcî la economie dal Friûl in chest moment tant dificil? Se no lu fasìn, il pericul al è chel di vignî glotûts cun plui facilitât intune altre fusion… cul Venit che, intune gramolade, si mangjarès dut chest ben di Diu, fasint deventâ cussì il Friûl, anzit il Friûl-Vignesie Julie, la otave provincie di Zaia. ❚