Istruzion parentâl, un dirit che al fâs discuti

Par agns un insegnant carinzian nol à mandât a scuele sô fie, nancje dopo che la Direzion Istruzion e Formazion e veve cirût di contrastâ chest compuartament e dopo che la Autoritât di control locâl e veve aplicât sanzions pecuniariis. Al è un câs particolâr, che al rivà a clamâ in judizi ancje la Cort Aministrative Federâl.
◆ Dut al scomençà intant de ultime pandemie, cuant che i gjenitôrs di une frutate di dodis agns a deciderin, intal an scolastic 2021-2022, di zovâsi dal dirit ae istruzion parentâl.
◆ Cui che le oten, tal mês di Lui, al à di frontâ un esam in forme di privatist esterni par dutis lis materiis insegnadis par oblic. La arleve di tierce medie però no passà l’esam di matematiche inte piês maniere. La leç in chescj câs e previôt che il student al vedi di ripeti la classe, frecuentant une scuele publiche in forme tradizionâl, lant indenant cussì fin ae fin dal oblic scolastic.
◆ Par efiet di chest, la Direzion Istruzion e Formazion carinziane e refudà la domande dai gjenitôrs di lâ indevant cu la istruzion parentâl. La diretore di chê autoritât e veve motivât la decision comunicant che “Ognidun al à di rispietâ lis leçs, e ogni frut al à un dirit ae istruzion cemût che e fisse la leç. Se chest nol ven garantît, la frecuence scolastiche e devente inmò plui impuartante. Al frut i covente un percors scolastic complet”.
◆ Dopo di chest, la frutate però e tacà a frecuentâ la scuele dome ogni tant, e duncje il preside de sô scuele medie al scugnì segnalâ in mût uficiâl il fat ae autoritât di competence, che e aplicà lis sanzions pecuniariis di 110 e 440 euros. In câs di inadempiment, e je previodude fintremai une condane ae preson fin a dôs setemanis.
Intes ultimis setemanis dal an scolastic 2022-2023, la zovine e tornà a scuele e e ve la pussibilitât di sostignî i esams di certificazion previodûts par ducj i arlêfs che, a tuart o a reson, a sedin stâts assents de scuele par tant timp, in maniere di podê misurâ la lôr preparazion reâl.
◆ La zovine cheste volte e passà i esams e rivà a lâ ae classe sucessive. Viodût il bon risultât, il pari al presentà un altre volte la domande pe istruzion parentâl, che i fo dut câs refudade. Chel alore al pretindè che la frutate e ves dôs zornadis libaris par podê stâ daûr a une scuele di musiche. La Direzion e dineà, motivant che nol jere pussibil slontanâsi de scuele cun regolaritât ni par musiciscj, ni par sportîfs, ni par nissun altri. Cuintri di cheste decision, il pari al presentà ricors ae Cort Aministrative Federâl par vê chel che al calcolave un so dirit.
◆ Dai ats al salte fûr che “Par cause dal esit negatîf dai esams di aciertament dal 2022 e des violazions ripetudis ae leç sul oblic scolastic vie pal an scolastic 2022-2023, si scrupule che la istruzion parentâl no rivi a garantî un nivel di istruzion compagn di chel de scuele publiche”. Al fo duncje ripetût che al jere obligatorie la istruzion in presince fin ae fin dal cicli scolastic, e si marcà la responsabilitât dai gjenitôrs tal rispiet di chest dovê.
◆ No si à di capî mâl la situazion. Il dirit ae istruzion parentâl al è un dirit costituzionâl e a son câs là che i gjenitôrs a istruissin i fîs a cjase in câs di malatiis sprolungjadis o permanencis lungjis intal forest, che no permetin di frecuentâ une scuele in maniere regolâr. Dut câs, no si pues aprofitâsi di chest dirit, soredut di bande di cierts grups, par dineâ ai fîs il contat sociâl o l’acès ae pluralitât di opinions e ae diversificazion culturâl o – piês inmò – dome par bonâ lis pretesis di gjestî il propri timp libar in maniere egoistiche. ❚