Il Club Alpin di Tumieç in esplorazion in Camboze

Ai 28 di Març (e ai 31 in repliche) al è stât presentât de Rai Regjonâl F-VJ il docufilm “Shadows of Cambodia” su lis esplorazions fatis in Camboze cirche 5 agns fa dal Grup Speleologjic Cjargnel – Sezion Cai di Tumieç, dal Grup Speleologjic Piemontês, dal Centri di ricercje ipogjee di Gjenue e dal Grup Grotis di Novara.
◆ Antonino Torre, che dutune cun Alfea Selenati e Claudio Schiavon a son i protagoniscj cjargnei di cheste esperience, al conte “Une prime esplorazion e jere stade fate, in realtât, za tal 2013. Un dai components de prime mission, il studiôs Giandomenico Cella, al à volût tornâ par studiâ plui a fonts lis zonis e i fenomens un grum particolârs di chest puest. In Camboze la part plui alte e je a 60 metris sore dal nivel dal mâr. Nus àn incuriosîts ciertis formazions che si viodin te planure, parcè che i fenomens carsics in chei ambients a son une vore cjalcjâts (ma achì o lin sul tecnic). Il documentari al è nassût in gracie di Antonio Consentino che, vint la passion di fâ filmâts a nivel amatoriâl, al à decidût di documentâ par nô cheste mission par vê un ricuart visîf. Nô o vin organizade la spedizion e si son zontâts ancje Vittoria De Regibus e Marco Scofert: o sin un grup di amîs e ducj cun origjins cjargnelis o di altris zonis dal Friûl.
◆ O vin scuviert, in maniere casuâl, che dentri des grotis nus mancjave l’aiar: plui o levin in profonditât e plui e cresseve la temperadure e la umiditât, e si vevin grancj problemis di ossigjenazion; cheste scuvierte à cjapât plui fuarce cul documentari. Il documentari speleologjic nol ven fat par jessi metût in onde par television ma par fâlu zirâ intai grups speleologjics – tant al è vêr che la prime e je stade fate par un grup internazionâl di speleologjie – e dopo al è lât in Americhe.”
◆ Ma ancje in Cjargne o vin tantis bielecis di scuvierzi. Di fat, Antonino al dîs: “Il nestri mont no lu cognossìn… nô o cjaminìn ogni dì sore di chestis grotis! Se tu vâs sul Pâl Piçul tu cjaminis parsore di cirche 300 forans… tal Colians sore di 50…
◆ Progjets in Cjargne a ‘nd jere e a ‘nd è, ancje se la situazion de pandemie no jude. Ma plui che su progjets speleologjics, tocje pontâ a fâ cognossi chest mont che al è alc di diviers dal esplorâ: esplorâ e cjatâ gnûfs ambients al fâs part de nestre passion, ma lu fasìn par nô stes. Invezit al tocje pensâ un alc par coinvolzi dute la int par fâ cressi il rispiet pal ambient e pal nestri teritori. Chest no vûl dî lâ in grote (a tancj ur fâs pôre chest ambient) ma cjapâ cussience che chest mont al esist e che al fâs part dal ambient dulà che o vivìn. Par un che al nas in Cjargne, che al vierç il barcon di cjase e che al viôt il paisaç che al à ator ator, cualchi volte al devente un fastidi. Invezit soredut in chescj moments si pues scuvierzi che e je une fortune vivi in mont e no in citât. Achì o sin intun paradîs, o sin nô che o vin di scuvierzilu. Nô si impegnarìn a realizâ altris documentaris par pandi la cognossince dai nestris biei lûcs.” ❚