In Bretagne, la repression de France cuintri de riunificazion

Il Stât francês, un dai plui nazionaliscj in Europe, pai fâi cuintri a lis minorancis no adote la tatiche de Italie (un altri biel vues in cont di nazionalisim) ven a stai il spietâ par spietâ, lis peraulis e nissun fat, il voltâsi de altre bande. Nol à fastidis a doprâ lis manieris fuartis e l’esempli nus ven de cuistion Bretone.
Di chês bandis, a van indenant lis iniziativis par domandâ la riunificazion dal dipartiment de Loire Atlantiche cul rest de Bretagne storiche intune regjon uniche, ma a compagnâlis dispès e je la rispueste repressive des autoritâts francesis. Doi i câs sucedûts il mês passât.
ARESCJ_ Intant dal Festival Interceltic che si davuelç zaromai di agns a An Oriant / Lorient, une delegazion de organizazion Bretagne Réunie e à otignût dai organizadôrs de manifestazion il permès di partecipâ ae sfilade dai grups adun cu lis realtâts che a rivavin de aree di Naoned / Nantes par rivendicâ la partignince di chest dipartiment ae Bretagne. Sul prin tacâ de sfilade funzionaris di polizie ju àn però arestâts par vie che, secont lôr, no vevin dirit di partecipâ a di une manifestazion culturâl, ma a àn vût di liberâju dopo che i organizadôrs a àn spiegât che la lôr partecipazion e jere stade autorizade. Chel istès la delegazion di Bretagne Réunie no à rivât a finî la sfilade par vie che i stes funzionaris di polizie ju àn obleâts a bandonâ la manifestazion dopo che a vevin fat une part dal percors.
NO AL CARTEL_ A Blaen, invezit, il prefet al à ordenât ae aministrazion comunâl di gjavâ un cartel logât su la jentrade dal paîs là che si rivendicave il dirit de Loire Atlantiche di partignî a di une regjon unitarie cun chei altris cuatri dipartiments bretons. A autorizâ il cartel al jere stât il consei comunâl cuntun vôt maioritari. Intal ordin de prefeture no son stadis nancje motivadis lis resons par gjavâ il cartel. ❚
Internazionalitari/Redazion