IL SIVILOT. Federalisim talian: une gjachete strente e curte pal Friûl

Un vistît strent, ve cemût che si mostre cualsisei progjet talian federalist che al intindi jessi adatât ae Regjon e in particolâr al Friûl.
Par restâ aes analogjiis sartoriâls, al reste simpri un model conformât, cuant che il cuarp di vistî al à ciertis sôs particolaritâts che i coventin misuris speciâls. Ma chest i politics locâi no lu capiran mai, prin di dut parcè che dispès a son ignorants e po dopo a son il prodot di une gjenerazion premiade dome de fedeltât al cjâf, al grup, e no dal binomi esperience e militance. Intal câs invezit di chei pôcs bogns ancjemò di formulâ un pinsîr critic, e risulte plui fuarte la sotanance al model talian che al à il statalisim tal so Dna. Ancje la Leghe si è sometude a di chel model, di là di declarazions e di proclamis. Pal Carroccio il probleme al è la sostituzion dal vertiç de piramide: no plui Rome, ma Milan. Se vuê al esist un partît centralist – di là dai parlaments dal Nord (ce fin àno fat, a proposit?)  e di adietîfs “nazionâi” tacâts sù aes realtâts regjonâls –, chest al è propit chel di Bossi. Cun, ae base, une vision economiciste dal probleme.
Ae fin, dal progjet presentât in Parlament, nol restial forsit dome che un plui grant control des jevis fiscâls di bande dai Comuns? Impuartant sigûr, ancje par evidenziâ lis responsabilitâts, ma il fin dal federalisim isal chel di cambiâ l’esatôr des tassis o chel di formulâ un diviers rapuart tra autonomiis locâls e stât centrâl?
Dut chest nus tocje dal sigûr ma al è apont chel vistît che al cole mâl, chê golarine a balins su la cjamese a riis. Un complet che in cualchi mût nus tocjarà meti, parcè che nissun nol à domandât un vistît su misure, ancje se o vevin, tant che ent autonom e speciâl, ducj i dirits di pretindilu.
Duncje cheste la assurditât che, vint la ocasion par fâlu, nissun al provi a nomenâ ancje in maniere timide la pussibilitât di dôs entitât difarentis tra Friûl e Triest.
L’OM DI BURI