Il plan de Regjon

A son cuatri i rams di intervent che la Regjon cu la zonte Serracchiani e à chê di puartâ indenant: il disvilup des filieris e dai sistemis produtîfs; il turisim sostignibil; la cure e la tutele dal paisaç e il miorament dai servizis. Plui un trasversâl, la inovazion, che e à di travanâ dapardut. Fasint une sume dai bêçs che a saran a disposizion tra fonts comunitaris, risorsis regjonâls e vie discorint, si stime che tai prossims cuatri agns a saran disponibii 114 milions di euros. L’impuartant, e à fat savê la presidente, al sarà evitâ lis falopis dal passât e condividi il plui pussibil i progjets par concori in maniere resonade ai bants che a saran publicâts la prossime Primevere. In chestis setemanis, partint di Damâr, si à tacât a discuti ideis, progjets e obietîfs, clamant adun aministradôrs, sindics, impresaris, sindicâts, par rivâ dentri de fin dal an al dissen complessîf che al sarà presentât in ocasion dai Stâts Gjenerâi de Mont. Serracchiani e Bolzonello, supuartâts dai funzionaris regjonâi e dai presidents di Insiel, Pozza, e di Innova FVG, Morgante, a àn domandât il massim impegn par rivâ a sierâ il sac in timp util pal vie da gnove Programazion comunitarie 2014-2020.
Su cuistions particolârs si sa za dulà che si larà a finîle: pe valorizazion dal bosc, par esempli, si spindarà par comedâ lis pistis forestâls, si lavorarà par rindi plurienâls lis concessions e si pontarà a certificâ prodots dal len inovatîfs; si puartarà indenant la sburocratizazion pes aziendis, cul auspici che a nassin lis zonis a burocrazie “zero”.
LA UNIVERSITÂT
La idee e je chê di creâ une “Scuele superiôr dai Mistîrs”, par recuperâ lis manualitâts di une volte, valorizant dut cuntun voli di rivuart pe ricercje e pe inovazion tecnologjiche, in maniere di rivâ a proponi sul marcjât prodots une vore competitîfs. No dome. La Universitât dal Friûl, cemût che a àn spiegât il Retôr De Toni e la professore D’Orlando, e à chê di sburtâ su la promozion des emozions che a podaressin rindi ciertis realtâts economichis di sucès tal teritori tant che l’Automotiv Lighting di Tumieç o Eurotech e Stroili di Damâr. Altre pussibilitât che si cirarà di sostignî e je chê dai FabLab, o ben i laboratoris dulà che il public e il privât a stan unîts par elaborâ e proponi prototips di gnûfs prodots.
I COMITÂTS
Chei che no crodin invezit ai “fûcs pirotecnics”  de Regjon a son i Comitâts dal teritori, che in chescj agns – de  aghe, ai eletrodots, al tribunâl – si son dâts lis mans intor par cirî di difindi e di recuperâ la anime dal teritori. “Cumò o cjapais lis pachis, dopo us curarìn”, al sintetize Franceschino Baraçut, cirint di interpretâ i ultins moviments de politiche regjonâl. Dal eletrodot aeri che si vûl fâ passâ pe val de Bût, al Tribunâl che no si à rivât ancjemò a tornâ a vierzi, fin ae cuistion dal servizi idric e ai destins fumôs di Carniacque, pe Mont no si met ben. E se propit si vûl ribaltâ il banc par delineâ un gnûf doman, a disin i comitâts, si à di tornâ a partî dal spirt de ricostruzion post taramot, dulà che si dave responsabilitât e pussibilitât di decidi e di auto organizâsi ae int, cence butâ jù dal alt ricetis che no stan ni in cîl ni in tiere. ❚
✒ David Zanirato