Il Juri dal Parlament European al conteste la legjitimitât di “Readiness 2030”

Che al vedi non “ReArmEU” o ben che si clami “Readiness 2030”, chel fat indenant de Comission Europeane (CE), vuidade di Ursula Von der Leyen, cul intindiment declarât di «incressi la fuarce militâr de Europe» e di «meti adun la difese europeane», si conferme un plan falât no dome pai siei contignûts, ma ancje sul plan de legjitimitât formâl.
◆ La cuistion di sostance e jere za clare tal mês di Març stât. Cun di fat, cemût che o vevin za scrit un mês indaûr, cundut di ciertis declarazions altitonantis, chel plan nol invie e nol disvilupe nissune difese europeane e de Union Europeane (UE), ma al previôt dome cundizions di favôr pai invistiments dai Stâts tal cjamp militâr e des armis, intant che no son ni une azion politiche concrete de UE e nancje une minime forme di coordenament plui strent di caratar intergovernatîf.
◆ La cuistion di forme juridiche, impen, e je sclopade plui indenant, ai 24 di Avrîl, cuant che la Comission pai afârs juridics dal Parlament European (PE), clamade ancje Juri, e à fat buine ae unanimitât une valutazion negative de procedure che e veve puartât la CE a sburtâ il so plan, cence implicâ il PE. Cun chê di lâ plui svelts e di sghindâ il passaç dal plan inte assemblee dai rapresentants dai citadins de UE, che e varès vût di resonâ plui in detai intor dai siei contignûts e duncje di votâi a pro o cuintri di chê propueste, in gjenerâl e in particolâr cun riferiment ae metude adun di un fonts di prestits di 150 miliarts di euros a pro de compre di armaments, la Comission europeane e veve fat riferiment al articul 122 dal Tratât sul funzionament de UE (TFUE), che al previôt che par vie di motivazions di urgjence si pues ancje fâ di mancul di consultâ il PE.
◆ Il parê dal Juri al è clâr: l’articul 122 dal TFUE al vâl in câs specifics, tant che chei des «calamitâts naturâls» e des «circostancis ecezionâls» che «a restin fûr dal control» dai Stâts e che par chel al covente che «il Consei, daûr di une propueste de Comission» al ledi dilunc cu la concession, in cundizions determinadis, di jutori finanziaris specifics, ma chel di “Readiness 20230” al è un câs diferent e il riferiment a chel articul al è falât.
◆ Chê cjolte di posizion e je di caratar tecnic e in chel istès e à un valôr politic une vore impuartant, massime par vie dal vôt ae unanimitât. Cundut achel, il parê dal Juri nol à fuarce vincolante e cussì la presidente dal PE, Roberta Metsola, e pues lâi daûr e fâ indenant un ricors ae Cort di Justizie de UE, cjapâ sù la iniziative di someti la cuistion al vôt di chê che le clamin ancje la Eurocjamare o ben ancjemò sielzi di no tignî cont dal parê dal Juri. In chest câs e à di visâ chê stesse comission dal PE e passâ la bale ae conference dai rapresentants dai grups parlamentârs.
◆ Intal moment che al va in stampe chest numar de Patrie, no savìn ancjemò cemût che e larà indenant la cuistion. La CE e mostre di vê di lâ dilunc cul so plan e i siei sostignidôrs, dentri e fûr dal PE, a justifichin cheste posizion cu la urgjence de situazion e cul fat che il stes Parlament al à palesât la sô opinion a pro des propuestis de CE cu la risoluzion che e jere stade fate buine ai 13 di Març. E je une posizion une vore discutibile, tacant dal fat che la risoluzion e je un at che al palese une posizion politiche gjeneriche, ma nol à nissune fuarce juridiche concrete.
◆ In cualsisedi maniere la cuistion e reste grivie e penze pe Europe, pes istituzions europeanis e soredut pai citadins de UE. ❚