Interviste cun Mauro Tosoni, dean dai gjornaliscj che a fasin informazion par furlan e “pai furlans”
Mauro Tosoni, classe 1945, al è a stâ Udin. Si pues considerâlu un dean dal gjornalisim furlan e par furlan. Dai timps li che al direzeve «In uaite», ae fondazion di Onde Furlane, aes ultimis esperiencis di «Il Diari» al à simpri cirût di contâ un «Friûl diferent».
_
Mauro, di dulà sêstu e in ce ambient sêstu vignût sù?
O soi nassût a Paulâr, mê mari e jere di li, e gno pari al jere asìn. O ai fat i prins doi agns di elementârs a Glemone, dopo si sin trasferîts in Venezuela dulà che o ai fat il rest des elementârs. O sin tornâts in Italie a Udin dulà che o ai fat mediis e liceu, e dulà che mi soi maridât a 24 agns. O soi lât a Milan, lant daûr de atrazion pai moviments politics dal ‘68 lassant la universitât a doi esams de fin. A Milan o ai fat une esperience di doi trê agns e o soi tornât in Friûl par vie dal taramot. Ah! Dopo mi soi laureât – tal 1979 – in pedagogjie: la tesi e jere su la storie de agriculture furlane.
_
In dut chest viazâ, sêstu vignût sù intun ambient furlanofon?
Par dute la infanzie e fin cuant che o jerin Glemone si fevelave par furlan, ma in Venezuela i miei mi fevelavin par talian parcè che in prevision di tornâ in Italie a calcolavin impuartant che o imparàs chel. Lu ai ripiât cuant che o soi tornât in Friûl dilunc dal taramot, dulà che mi soi cjatât “tal mieç” dal furlan. Tes tendopolis si fevelave chel: in prin o ai stentât, dopo mi soi sbrocât e mi è deventât naturâl.
_
Dal pont di viste linguistic cui sono stâts i tiei mestris?
Un al è Adrian Cescje/Adriano Ceschia. Jo o ai scomençât a scrivi par furlan sui miei aponts intal 1977 e o scrivevi cu la sô grafie. Tant che gramatiche o consultavi chê di Nazzi. Però, viodût che cheste rubriche si clame “mestris”, o ai di dî cence retoriche che cui che mi à introdusût pardabon ae lenghe e je stade la int che e fevelave di politiche, di economie, di ricostruzion par furlan. Une grande influence le àn vude i predis di Glesie Furlane che a vignivin ai coordenaments, che a fevelavin cuntun furlan spetacolâr (al marche ben la peraule, ndr). Mi visi in particolâr dal biel fevelâ di pre Giulio Ziraldo e, plui tart, di pre Rizieri De Tina. Frecuentant i predis di Glesie furlane o ai ancje vût la ocasion di viodi il furlan tant che lenghe liturgjiche. Mi à colpît une messe cui cjants aquileiês a Dalès.
_
E a proposit di lenghe scrite, ti visistu la prime robe che tu âs let par furlan?
La «Cuintristorie dal Friûl» di pre Josef Marchet. Ancje parcè che jo o soi apassionât di storie, e chel di Marchet al jere intun furlan tant biel e facil di lei. E po dopo tantis traduzions che al fasè Gianni Nazzi, che al jere convint che par dâi dignitât a une lenghe al coventàs voltâ i grancj classics dal mont.
_
Isal cualchi episodi in particolâr che ti à sburtât a vê un pinsîr furlanist?
Un episodi che mi à fat rifleti al è stât cuant che il Vietnam al à invadût la Camboze. In chê volte intai ambients de çampe si fevelave tant di internazionalisim. Mi rindei cont che ancje sot chei concets al esisteve un sostrât nazionalist. Ancje il Vietnam, che al jere calcolât campion dal internazionalisim, al dimostrave di vê interès nazionaliscj. In Friûl, invezit, o ai scuviert il mont dai popui che a riclamavin il dirit al ricognossiment, e il Friûl al jere un di chescj. Par chest al à contribuît la leture dal libri «Popoli e lingue di Europa» di Guy Héraud e dopo i libris di Salvi «Patria e Matria» e «Le lingue tagliate» e la racuelte di articui de «Patrie» di pre Marchet, saltade fûr inte edizion de «Nuova base» propit un mês prin dal taramot. _
_
Tu sês apassionât di storie, mi dîstu cualchi mestri di storie furlane?
Se il discors de lenghe al è il prin che mi à introdot ae idee di popul furlan, al è leìnt Leicht e Perusini che o ai scuviert realtâts tant che chê des Viciniis (une sorte di autoguvier contadin de comunitât, ndr), che al è un aspiet distintîf e carateristic de identitât furlane. Une forme di autoorganizazion sorevivude intal timp, che dopo si trasforme par esempli tal coordenament des tendopolis.
O ai let ancje Paschini, ma al veve une impostazion classiche: la storie che mi interesse di plui no je chê di bataiis o nons, ma la storie sociâl dai popui, il mût di vivi e organizâsi.
Une leture impuartante e je stade Bartolini, che in tancj dai siei romançs al meteve tantis particolaritâts storichis sul Friûl e al contave di un Friûl diferent, di furlans che no jerin dal stereotip “salt, onest e lavoradôr”. Par esempli tal libri «La linea dell’Arciduca» il protagonist al jere un disertôr.
_
Di chescj tiei studiis al sarà vignût fûr ancje il non «In uaite», che tu sês stât diretôr.
Il non «In uaite» al ven fûr di un studi propit di Perusini su Cividât, che al contave di cheste polizie popolâr. Si clamave “la vuaite” chê vie pal dì e “la schirivuaite” chê di gnot. Al jere un dai nons proponûts pe riviste: o ai i aponts de riunion dai 19 di Novembar dal 1977 li che o vevin di decidi. Chei altris a jerin «Mans, voi e rabie», «Cence pôre», «Voi par viodi» e «La glagn». O vin sielzût «In uaite» parcè che al pandeve miei il concet di control popolâr.
_
A proposit di gjornalisim par furlan, âstu vût cualchi mestri?
No trop: o leievi «Int furlane» e «La Patrie dal Friûl». Tant che scriture gjornalistiche, ma no dome, o preseavi chê di pre Toni Beline, bielonone. In sumis o disarès che plui che a un model mi soi simpri inspirât a une convinzion, che la lenghe furlane e jere buine di tratâ cualsisedi argoment, de croniche nere al sport, si tratave dome di doprâle.
Mestris ideologjics, chei che a àn savût rapresentâ il Friûl in chel moment? I predis che achì in Friûl a son simpri stâts bogns di interpretâ lis aspirazions dal popul, po dopo Schiavi e Di Caporiacco dal Moviment Friûl. Un che nol si nomene avonde al è Silvano Pagani, autôr di tantis bataiis e pilastri di Onde Furlane, che o vevin fondât insiemi a Federico Rossi e tancj altris. Om di grande fuarce e di grande coretece. Po dopo Adrian Cescje, za nomenât prime: un che al à cirût di puartâ il furlanisim viers la modernitât.
_
A proposit di ideologjie, cemût ti definiressistu dal pont di viste filosofic? Furlanist, autonomist, indipendentist… E ce aspirazion varessistu pal Friûl?
Ce domandone! Vie pai agns o soi stât un pôc dut: nazionalist, autonomist, indipendentist… Ae fin di dut il percors mi definirès autonomist. La forme “autonomie” e je chê plui percoribile par vê il ricognossiment de proprie identitât e realtât. Ma vuê o stin lant a cessecûl ancje su chest: o sin tornâts sot Triest, che si à mangjât dut. Cu la gnove regjon il pês specific dal Friûl al è aromai minim. O crôt che chê de autonomie e sedi une bataie che e coventarès tornâ a fâ, scuasit dal inizi.
Sigûr che la aspirazion finâl e je simpri chê di vê une autonomie politiche complete, ancje se pensant ai disastris che a son daûr a fâ i nazionalisims, ti restin dubis se riclamâle ancje pal Friûl.
_
Personaçs che a àn rivât a incidi su la storie dal Friûl?
Par che che inten la storie in gjenerâl, o torni sul concet di prin: le fasin chei cence non. Duncje, no indi fasarai nissun. Se invezit si fermìn aes concuistis “identitariis”, Silvana Fachin Schiavi che si è batude par fâ aprovâ leç 482 su la tutele des lenghis minoritariis. Tra i politics, i deputâts furlans che a an rivât a puartâ a cjase la leç su la ricostruzion e chê pe Universitât: mi visi in particolâr di Arnaldo Baracetti, Franco Castiglione, Giorgio Santuz. Fevelant di Universitât, Tarcisio Petracco: vêr motôr de sô nassite. Un rûl impuartanton al è stât chel di Remo Cacitti. La sô bataie par tornâ a fâ sù Vençon come che al jere, e fâs capî che la identitât si pant ancje intal mût di fâ lis robis materiâls: Vençon al è un monument de nestre identitât.
_
Ultime domande, un personaç o opare che par te al varès di jessi valutât di plui.
E je dute la storie dal Friûl che e varès di jessi cognossude di plui.
Di resint o ai let il libri Bruno Figliuolo, insegnant di storie medievâl ae Universitât dal Friûl: «Alle origini del mercato nazionale». Intun cjapitul, che al à par font i archivis di Cividât, al sosten che il capitalisim moderni al sarès nassût in Friûl. I florentins a àn fondât il lôr mût di fâ economie vignint in Friûl un secul prime di ce che e diseve la storiografie fin cumò. Ve: chest par me al è un esempli di chel che al varès di fâ la storiografie locâl. ❚
…………………………………………………………………
FOCUS. Il personaç
Pier Silverio Leicht (Vignesie, 1874 – Rome, 1956).
Fi dal patriot venit Michele Leicht, al studià a Vignesie, Turin e Padue, laureantsi in jurisprudence intal 1896. Al è stât diretôr de Biblioteche civiche di Udin (1900-1902), tacant dopo (1903) la cariere academiche, insegnant Storie dal dirit talian in variis universitâts: Camerin, Siene, Cagliari, Modene, Bologne – dulà che al è stât preside de Facoltât di Jurisprudence (1926-1934) – e infin ae Sapienza di Rome, là che al è stât preside dal 1938. Soci dai Lincei dal 1920 indenant, al fo vicepresident dal 1936 al 1938. Al à fondât o al à vuidât istituzions culturâls furlanis impuartantis, tra chês la Società friulana di storia patria, la Deputazione di storia patria per il Friuli e la Societât filologjiche furlane. Al è stât ancje atîf inte Societât Alpine Furlane. Iscrit al Partît Fassist intal 1923, al deventà deputât e dopo senatôr; al è stât sotsegretari ae istruzion publiche (1928-1929) e al à partecipât a organisims legjislatîfs e culturâls dal regjim. Dopo il 1944, pe sô adesion al fassisim, al fo esonerât dal insegnament e radiât dai Lincei, ma al larà indevant a studiâ e insegnâ, contribuint a congrès e iniziativis sientifichis fin ae muart, sucedude a Rome intal 1956. ❚
