✽✽ In chescj ultins mês al somee che e sedi daûr a slargjâsi une sensazion di impotence devant de disposizion che “Il Podê” al à cjapât su la cuistion furlane.
✽✽ A cualchidun i somearà esagjerât che si dopri chest tiermin par descrivi un sisteme di control e comant che al risulte in efiets ben plui articolât, ma propit par chest so aspiet complessîf si pant, ae fin, tant che un pinsîr unic in stât di esercitâ a plen lis sôs funzions centralistis.
✽✽ Pensait par esempli cetantis che voltis, e intes situazions plui svariadis, che si dopre l’adietîf “identitari”. No je cerimonie publiche o iniziative politiche là che nol vegni pronunziât in bande dal tiermin malfamât “Teritori”. Benon. O podaressin pensâ a une cussience di popul tornade in vite, che e cjate rispueste intai governants, ma se dopo anìn jù intai particolârs, se o domandìn cemût che cheste asserzion si coniughe cu la pratiche, si acuarzìn di trop e cemût che nus a stan cjolint vie.
✽✽ L’esempli plui clâr al rive di GO2025, là che ancjemò cualchi aministradôr regjonâl si acane a sostignî che il furlan al à une sô presince inte comunicazion uficiâl dal avigniment. Nol è vêr, anzit la sô assence aciertade e dimostre di une bande la falsetât di chestis declarazions e di chê altre che no esist nissun intindiment di cambiâ cheste disposizion, confermant la sensazion che intai ultins timps in Regjon e sedi tacât il campionât mondiâl dal “no mi visi” e dal “la cause no je nestre”.
✽✽ Il pinsîr però nol pues fermâsi a episodis ugnui, ae cuotidianitât dai acjadiments negatîfs. O crôt che al coventi vê il cûr di frontâ la domande “puedial esisti un sintiment identitari regjonâl, puedial nassi di une Regjon che di unitari no à nuie, nassude dome di un compromès par une situazion internazionâl che e tocjave Triest e il confin orientâl?”
✽✽ Che nissun al olsi tirâ fûr “cjampanilisims” tra Friûl e la capitâl juliane, parcè che al è pal ben di dutis dôs lis realtâts che il riclam ae identitât al rivoche a fuart in ogni assemblee, in ogni ocasion.
✽✽ A ognidun la sô, però, se di no no al è dome aiar frit, che al puce di fogne. ❚