A cent agns che al è nassût pre Checo Placerean (30.11.1920). Predi fûr dal ordenari, libar e profont, ma al jere cjalât di brut de curie, dai sorestants de glesie, tant che i clerics – se par cumbinazion lu incuintravin fûr dal seminari – no podevin fermâsi a fevelâ cun lui. Lu definivin “Lingua satanica”. In realtât al jere un om libar, diferent, scomut, come ducj i profetis. E la gole dal proibît e jere ancje tra i clerics, che cun cualchi sô batude si ricreavin e se gjoldevin.
A ricuart di cheste figure, di chest nestri grant profete, La Patrie e propon a pontadis un intervent di pre Antoni.
pre Roman Michelot
Pre Checo nus vignive dongje come il sarpint dal Eden e nô o vin cirût di fâi capî che no podevin fevelâ cun lui, ancje se la gole e jere tremende. Alore nus à berlât, fra un buf e chel altri di fum: “Andate, andate nella sacra tana!”. O ai ancjemò tes orelis il sunôr des sôs peraulis cjamadis di ironie: “Atents di no svicinâsi masse dal boborosso, di no pierdi la vocazion! Al è miei restâ indurmidîts che no pierdi il fervôr dal seminari”.
◆ Jo o ai viodût simpri pre Checo intun stamp diferent, alternatîf, provocant, rispiet ae normalitât, fûr dal côr in timps di coralitât o, miôr, di monodie gjeneralizade, fûr di rie in agns che ducj si veve di vê une parochie o democristiane o socialcomuniste. E chest al jere tant plui scandalôs in cheste part rimite e confinade dal imperi, cui nemîs storics aes nestris spalis, e duncje condanâts a jessi no dome talians ma talianissims e no dome cristians ma ipercatolics e iperromans. A discapit de nestre identitât, peculiaritât, vocazion storiche, gjeografiche e culturâl che e vignive sacrificade cence pudôr e cence dolôr sul altâr des ideologjiis.
◆ Pre Checo nol diseve messe in timps che la vite dal predi e jere ingolfade di messis, jespui, funzions, coroncinis, novenis, oris di adorazion, devozions privadis e publichis, prins vinars e sabidis e vie. Al veve il fiât di dâ la assoluzion al inizi de messe cuant che chei altris predis a batevin fûc e flamis, par altri inutilmentri e patetichementri, su la confession auricolâr tridentine “cum omnibus circumstantiis numeri et loci”. Al vignive une volte ad an in domo, in Zenâr, a concelebrâ la messe bizantine, cun dute chê ricjece musicâl e rituâl che par nô catolics romans al jere une sorte di bal dai indians e lui che si sintive verementri e finalmentri tal so ambient. Al diseve mâl de Azion Catoliche, “quella cosa con la quale o senza la quale tutto resta tale e quale”, cuant che la cariere dal predi e dipendeve de sô capacitât di organizâ i pre jù, i pre sù, i aspirants, lis beniaminis, e di formâ chei cuadris di cristians impegnâts che a levin a finîle ducj tal laip de democrazie cristiane. E lui si permeteve di dî mâl dal partît catolic cuant che i predis a tontonavin, dacuardi e in comunion cul vescul e cul Vatican, di “votare, votare bene e votare uniti”. E pai plui stupits e biâts, si veve di jessi ancjemò plui precîs: “Votare croce su croce”. E magari fâ lis provis su la lavagne, come inte canoniche di Rualp. ❚
