Il 2016 de politiche al sarà un an fondamentâl pe autonomie

An gnûf, politiche gnove? Nol è cussì facil strolegâ su ce che nus spiete te politiche furlane intal 2016, ma dut câs si tratarà di un periodi fondamentâl. No dome parcè che a laran a votâ un grum di aministrazions, a scomençâ di Pordenon e Triest, ma soredut par capî dulà che e larà la nestre autonomie. Di fat, si tornarà a scrivi il Statût de Regjon Autonome Friûl-Vignesie Julie e chest passaç al sarà determinant par scuvierzi se la nestre Regjon e deventarà come chês altris o se e savarà rinovâ lis resons de sô specialitât. Par fâlu, tancj in Friûl si spietin che la discussion su la riscriture de Cjarte che e je ae fonde de nestre cundizion no resti sierade intes stanziis dal consei regjonâl ma e vegni slargjade ae comunitât midiant di une Convenzion, o almancul une consultazion publiche come che a stan zaromai fasint Val di Aoste, Trent e Bolzan.
L’orientament de presidente serracchiani nol è ancjemò clâr, ma al somee che e vueli fâ ae svelte, cence involuçâsi in audizions chilometrichis di int, che a ralentin il lavôr e che a fasin pierdi dome timp. Il moment dut câs al invide a jessi democratics: l’avignî de nestre tiere nol pues jessi robe di pôcs. Ancje parcè che la partide dal referendum su lis riformis che si tignarà in Otubar e passarà chenti ancje dal grât di autonomie che si rivarà a sigurâ ae nestre int.
Fevelant di avignì, chel imediât al rivuarde lis aministrativis che si davuelzaran ai 12 di Jugn in 42 Comuns, 6 parsore dai 15 mil abitants e 36 plui piçui. Jenfri dai prins, dulà che lis elezions a podaressin lâ ancje al secont turni, a son Codroip, Cordenons, Monfalcon e Sant Vît ma prin di dut Pordenon e Triest, cjâf lûcs une vore impuartants pai ecuilibris de politiche di cjase nestre: cumò a son in man al centriçampe ma se a Jugn a cambiassin paron a fasaressin passâ doi agns di Infier ae zonte regjonâl. In tancj altris paîs dal Friûl si larà aes urnis: di Palme a Tisane, di Tarcint a Grau, di Maian a Romans. Pardut si resonarà di situazions locâls, ma sino sigûrs che no contaran ancje resonaments plui larcs, come lis Uti o la riforme de sanitât? ❚
Walter Tomada