I leons di Vignesie: un simbul dai parons che i furlans no àn scancelât

Tal Regio Ginnasio – Liceo “Jacopo Stellini” la Storie e la Filosofie a son materiis di fonde. No come il Latin, il Grêc e il Talian ma, se il professôr al è navigât, a son juste chês che a puedin dâ un tai particolâr ae preparazion e al stîl relazionâl di une classe. No stin fevelant dome di contignûts ma, soredut, di disvilup dal sens critic necessari par rivâ ognidun a dâ un sens ai fâts e aes vicendis dal timp storic che si fevele. Cussì il nestri prof di storie di trat in trat si slontanave dal libri di test e al jentrave te storie dal Friûl, puartantnus esemplis pratics e dongje di nô des motivazion economichis di vueris, bataiis, aleancis e matrimonis e de lôr ricjadudis te nestre tiere. Il prof. Ros (lu clamarai cussì) al jere di çampe, e no lu platave, ma il dibatit, te classe tierce “E” dal liceu, la ultime prime dal grant esam di mature, al jere viert, libar, vivarôs e rispietôs di ducj.
◆ L’an passât il prof. Ros nus veve fat un cjâf che mai su parcè che Vignesie e veve concuistade la Patrie dal Friûl e soredut su cemût che le veve guviernade. Il prof al è autôr di saçs su la economie di Vignesie te Ete Moderne, duncje al jere rivât a travasâ in noaltris students avonde di chel so savê e a fânus capî il tratament di “colonie” che la Serenissima e veve doprât no dome pal Friûl ma ancje par dutis lis citâts venitis. Nô, come Trevîs, Padue o Vicence, o jerin il “Stato da Tera” de Dominante, cence podês impuartants, che a jerin ducj in man dome dai nobii venezians. Duncje une tiere di molzi e disfrutâ di plante fûr a pro de aristocrazie de lagune. “Vignesie – al jere il struc de analisi dal prof – nus à dât trê secui di stagnazion economiche e demografiche e cualchi contentin.”
◆ Chest an o sin daûr a studiâ il “Risorgimento” doprant la clare leture dal prof fûr dai schemis talianons dal libri. Al veve sierade la sô ultime lezion sul plebissît pustiç dal 1866 e su cemût che il Ream di Italie si jere insedât in Friûl, disint che daspò nus varès fat viodi cemût che il nazionalisim talian al ves doprât ancje Vignesie.
◆ “Bundì, fantats, – al salude jentrant in classe – vuê o vin dôs oris tacadis, il timp al è biel e o profitìn par lâ in place Libertât. O fasarìn lezion alì.” “Oh ce ben – a pensin ducj – dôs oris a spas e cence libri!”
◆ “Come che o savês, scuasit dut il Friûl al è stât sot paronance di Vignesie dal 1420 a Napoleon – al tache il prof intal mieç de place – e duncje al à scugnût jemplâsi dai simbui de “Serenissima”. Come che al è capitât masse dispès ai furlans cui parons di turni, i udinês, par no falâ, a plaçarin fintremai trê leons di S. Marc in cheste place “Contarene”, il lûc plui simbolic dal podê civic.”
◆ “Prof, a ‘nd è ancje un piçul alì – al zonte Leo, il solit lechin fruielibris – sot dal puiûl de lobie.” “Sì, ma al è dentri dal steme di un lutignint – al rispuint il prof – e tu, Pieri, cjalimi me e no dutis lis fantatis che a passin, sù po! Alore, ducj chei leons, simbui de Dominante, a faserin une male fin cuant che a rivarin i francês di Napoleon dal 1797. Chel parsore dal arc Bollani che al mene in cjistiel al fo butât jù, i gjavarin lis alis di ram e fat a tocs, chel adalt su la colone al fo tirât jù e decapitât cu la mace. Dome il leon de tor dal orloi di Zuan di Udin si à salvât parcè che al somee che cualchi sorestant udinês, plui venezian di chei di Vignesie, un mês prime che a rivassin i francês, al vedi tirât sù un mûr di modons e malte par platâlu.”
◆ “Prof, o ai dôs domandis – e dîs Claudia – intant, se Napoleon al à sdrumâts chescj leons e dopo Vignesie no à plui vût podê sul Friûl, parcè sono tornâts tal lôr puest? E dopo, no vevial di fevelânus di cemût che il nazionalisim talian al varès doprât ancje Vignesie?”
◆ “Lis dôs domandis, Claudia, a àn la stesse rispueste, se mi lassais lâ dilunc. Cuant che son rivâts i talians in Friûl tal 1866, e us ai za fevelât cemût, a àn scrusignât cemût infuartî i simbui de italianitât che achì a jerin avonde flaps: sì e no il cinc par cent de int e fevelave talian, la plui part e jere di lenghe furlane e dopo a jerin slovens e todescs. Il simbul dal Friûl, la acuile, no jere masse benviodude, parcè che il Patriarcjât e la Patrie dal Friûl a scjavaçavin plui culturis, no dome che taliane. E alore, ce isal di miôr se no marcâ la partignince veneziane doprant il so simbul, ven a stâi il leon di S. Marc?”
◆ “Alore, prof – e interven Agnule – i leons ju àno tornâts a meti i talians?” “No, a son stâts chei furlans plui talians dai talians. Daurman tal 1866, a pene passât il plebissît, a àn gjavade vie il mûr che al platave il leon de tor . Tal 1883 il Consei Comunâl di Udin al deliberave di tornâ a sculpî e meti il leon su la colone. Plui lungje la storie dal leon dal arc Bollani che al jere il plui bocon. Dome tal 1933 il podestât fassist Gjin di Cjaurià, tant che rispueste al câs dai leons de citât dalmate di Traù sdrumâts di une bande di fanatics slâfs, al ordene di tornâ a fâlu e di metilu sul arc. Par presse e par sparagnâ, al ven fat di zes e cussì al reste, simpri plui fruiât, fin al 1953. In chel an si decît di fâ chest bocon di leon, 35 cuintâi di piere, ma cuntune diference dal origjinâl. Il leon di prime al cjalave a Tramontane, chest invezit al è voltât viers la place. Tal tornâ a fâlu a àn stimât che al jere miôr che il leon al mostràs la muse ai citadins, invezit che il cûl. Un leon alore plui educât e, forsit, mancul dominant.”
◆ “Prof, o ai capît che a àn tornât a meti in mostre i prins doi leons venezians dopo che Udin al ven cedût al Ream de Italie – al dîs Luche – e chest ultin une prime volte cul fassisim e une altre in plene republiche taliane. Mi à vignût iniments che gno nono, che al è a stâ a Gardiscje, mi à fat viodi ancje alì un leon su la colone e un altri su la puarte dal cjistiel di Gurize. Chês tieris no sono jentradis in Italie dome dopo de prime vuere?”
◆ “Magari cussì no e je tante ignorance de nestre storie e tancj di lôr a colin tes fufignis de propagande nazionaliste. Tal Friûl di Jevât i talians le àn fate ancjemò plui sporcje. Se a Udin i venezians a àn paronât par plui di tresinte agns, il Gurizan al è stât cu la Austrie par plui di cuatri secui. In dut chest timp Gardiscje e je stade sot Vignesie dome par une zumiele di agns e Gurize juste un an sôl. Nancje dî che a jerin plenis di acuilis cun doi cjâfs. Cun dut achel, tal 1919, pene concuistadis, i talians a tirin fûr di une cjanive un leon e lu metin su la puarte dal cjistiel di Gurize e, tal 1924, a tirin sù a Gardiscje un leon gnûf su la colone che a clamin de “Redenzione” come se i furlans di venti là, simpri stâts fedêi al Imperadôr, a vessin dibisugne di “redenzion”! Duncje la ecuazion de propagande e je: Leon = Vignesie = Italie”.
◆ “Dopo vê cjolt un coni di gjelât, il trop al jentre tal Stellini. “Dulà sêso lâts?” al domande Ivan, il bidel amion, a Pieri. Il fantat jal dîs e i spieghe la traine dai leons. “Ah, – al sclope il bidel – e je simpri chel intric cui parons! Ma tal gno paîs, a Masaruelis di Torean, je vin petade! Te conti. I vons dai vons a domandavin di fâ une fontane tal paîs par no lâ simpri a aurî te risultive lontane. I sorestants no dome no volevin fâle ma, cuant che la int e à cirût di fâle di bessole, a àn fat di dut par metiur i bastons tes ruedis. La int e à tignût dûr e, ae fin, e je rivade a fâ la fontane te place paiant di sachete sô. E, par dâle tal nâs ai sorestants, parsore de fontane a àn metude la statue di un leon sierât intune chebe di fier. Un leon in preson! Se tu vâs a Masaruelis, ancje in dì di vuê, tu cjatis la prove di une autoritât prepotente vinçude e sbeleade di une comunitât determinade e unide!” ❚