I coments. Par Fontanini “riferiment par chei altris popui”, Serracchiani “nol conven”, par ducj un spont par fevelâ di cuistions di chenti

In Friûl il dibatit su lis elezions catalanis al à cjatât sugjeriment tai titui dai gjornâi di chenti, che a àn titolât a fuart su la vitorie dai indipendentiscj, tant che al semeave cuasi un anunzi de separazion fra Spagne e Catalogne.
“Intal senari european complès di vuê, la creazion di un altri piçul Stât o in gjenar lis framentazions no puedin jessi un fatôr di vantaç par nissun, ni par chel Stât e nancje pe costruzion di une Union Europeane federâl e regjonaliste”. Par Serracchiani “oponisi cun durece aes aspirazions di autonomie de Catalogne, cemût che al à fat in clâf centraliste il Guvier Rajoy, al è stât falât e al à provocât reazions che si son viodudis intes urnis”. Po dopo, e cjape ancje jê la ocasion pâr fevelâ di cuistions locâls: “I rapuarts tra lis autonomiis regjonâls e i podês centrâi dal Stât – e à zontât – a varessin di jessi simpri impostâts sul dialic, su la ecuitât e su la solidarietât. Un rapuart che in Italie si fâs cu lis relazions istituzionâls e finanziariis tra il Stât e lis Regjons autonomis, prin di dut cun chês virtuosis”.
Il President de Provincie di Udin Pieri Fontanini al à aprofitât par tornâ a bati su une cuistion furlane: “Ancje il Friûl che al sedi determinât intal difindi la sô identitât, sostignint la iniziative referendarie pe istituzion di dôs areis autonomis, il Grant Friûl e Triest”. Al è l’apel che al à indreçât ai furlans. “Chel catalan al è un altri risultât impuartant pai piçui popui europeans dopo il sucès dal Scottish National Party de Vierte passade; chestis dôs comunitâts, esprimint in mût compat il lôr vôt, fasint jeve suntun sens identitari fuart e di apartignince ae lôr tiere, a rivaran a fâ sintî di plui la lôr vôs e a dâi cussì concretece ai lôr dirits e aes lôr rivendicazions. I risultâts de Scozie prime e de Catalogne dopo, a son riferiments ancje par altris popui che a podaressin pontâ a rivâ ai stes obietîfs”, al marche Fontanini. “Intal vôt di îr, i valôrs identitaris fuarts di un popul a àn fate la diference: lidrîs, culture, storie, autonomie. Elements di no sotvalutâ”.
Ancje Zuanfranc D’Aronco al aprofite dal spont catalan par fevelâ de situazion furlane: “La int e je atirade simpri di ce che al è grant. Ma la Catalogne e à dome 7 milions di abitants. La Slovenie a ‘nd à doi, e e je deventade un Stât. Il Friûl a ‘nd à un, e a ‘nd è altris ben plui piçui. Forsit che i dirits storics, gjeografics, economics, linguistics si misurin a pês? I nestris governants invezit a procedin lant bande l’acentrament su scjale comunâl, provinciâl, regjonâl, nazionâl.”
Par Sergio Cecotti, ex sindic di Udin e ex President de Regjon: “Nô o vin il probleme di Renzi, lôr chel di Rajoy. Dôs figuris che a àn in comun tancj ponts negatîfs. I catalans, però, a àn la fortune che di chi a pôc Rajoy al larà vie. Renzi al fâs passâ tant che inovativis lis sôs propuestis centralistichis, ma a son concezions che a jerin za stravecjis intal 1830.” E ancje lui al va indevant fevelant di Friûl: “O vin di creâ une coalizion là che lis variis animis de regjon si dedin dongje par difindi la specialitât cuintri il progjet Renzi-Verdini di riduzion des regjons. Une coalizion teritoriâl che e tegni dentri dutis lis sensibilitâts politichis presintis in Friûl-VJ. Là che a sedin personis che a fasin riferiment sedi al centridiestre sedi al centriçampe, e che no vuelin l’anulament de specialitât. Nol è un moviment autonomist, ancje se i autonomiscj a àn di fâi part”. ❚
Redazion