I Colonos a disin no

In File 2014 si vierç cuntun grant “NO!”, stampât su ducj i manifestuts e volantins de associazion dai Colonos. Un NO! grant che al samee un mûr. Un mûr cuintri ce?
Prime di dâ une indicazion sul percors proponût di Fidrì dai Ros, insiemi al nestri ben cognossût Agnul Floramo e Gotart Mitri, o crôt che al sedi impuartant provâ a dâ une sorte di incipit che mi è parût di vê cjatât, in relazion ae iniziative dai Colonos, chê altre sere, cjalant un film: “La mafia uccide solo d’estate”. Un film ironic, delicât e inteligjent dal regjist Diliberto. Il protagonist ae fin al dîs: “O ai capît ce che al vûl dî deventâ pari. Al vûl dî parâ to fi dal mâl e insegnâi a ricognossilu”. Un sproc che al met adun ducj i intents dal NO! di In File 2014. Cuâi sono i valôrs utii par podê ricognossi il mâl e rivâ a oponisi cuntun NO!?
Il program (che si pues viodi par ben sul sît dai Colonos: www.colonos.it) al partìs dai NO! di chenti par slargjâsi ai tancj NO! ator pal mont. Une sorte di cercli cuntun centri che al partìs de storie locâl, come i ebreus di Sant Danêl depuartâts a Auschwitz, par rivâ insom, ai 25 di Avrîl, cu la presince dal artist balarin turc Erdem Gündüz che al metarà adun il so Man Standig (Om in pîts), la forme di proteste puartade cheste Vierte passade denant dal Ataturk Cultural Center in place Taxsim a Istanbul, cuintri il regjim di Erdogan, premier turc di vuê. Un om, in pîts, fer, imobil, come un arbul, come un mûr. Un NO! cidin, ma presint. Un esempli, un dai tancj che a passaran jenfri musiche, poesie, storiis e confronts te suaze dai Colonos a Vilecjasse. Un NO! di tantis formis, in tancj mûts, che al varès di rivâ a jemplâ di significât ancje il nestri vivi di ogni dì, parcè che la provocazion di chest dineament no pues restâ “sterpe” e lassade tes stanziis dai Colonos. E à invezit  di deventâ samence par jemplâ di sens chei NO! che ancje chi di nô no mancjin, e no àn di deventâ o restâ un bruntulâ cence sens di pôcs di lôr, ma il pont par ricognossi e ricognossisi in ce che al jude a cressi, a vivi; contraponût a ce che al ferme e al cope, dentri il cjâf e il nestri cûr. Un NO! par dî SÌ a ce che al à valôr. Apontament fin ai 25 di Avrîl a Vilecjasse, ai Colonos! ❚
Mauro Della Schiava