I cjarsons di Enrico Urban, une tradizion che si fâs zovine

“’Il granello’ al è un laboratori artesanâl indulà che a vegnin fats prodots di cualitât doprant dome materiis primis tipichis dal nestri teritori” – cussì al conte Enrico Urban, zovin di 24 agns di Piedim (frazion di Darte) che tal Novembar 2022 al à vierte cheste ativitât a Tumieç. “Dut al è nassût cuant che mê sûr, che e veve un ristorant a Darte, nus à domandât a mi e a mê mari di fâ cualchi cjarson pe sô ativitât. Cul lâ dal timp o vin pensât di vierzi un laboratori, ma sul imprin al è stât dificil cjatâ un puest, dut câs ae fin lu vin cumbinât a Tumieç. Jo o ai studiât scaletarie a Cividât. Mê mari, par dî il vêr, e à simpri fat un pôc di dut e cumò mi da une grande man. Nô o fasìn cjarsons aes jerbis, cjarsons dolçs e gnocs.
◆ O sin i unics che ju fasìn cu la paste di cartufulis e farine (par solit, la paste e ven fate dome cun aghe e farine). Chest nus puarte plui lavôr par preparâju e nus coste di plui ma, par nô, il prodot al à une cierte delicatece e si maride benon tant cul impast che cun ce si dopre pe cuince. Sul imprin o vin tacât a fâ un unic prodot e a vendilu conzelât e dopo planc placut il cercli dai clients si è slargjât e o fasìn plui prodots frescs che nus àn permetût di vendiju ancje tai piçui alimentârs. O vin sielt di vendi la nestre produzions ad in grues.
◆ I nestris clients a son ristorants, latariis e piçulis buteghis. No vin fat publicitât: jo mi fâs cognossi lant tes buteghis e tai ristorants e ur fâs cerçâ il prodot. Dôs o trê voltis ad an però o partecipìn a manifestazions indulà che ancje il privât al pues vignî a cerçâ i nestris prodots. Par solit o sin simpri ae ‘Festa della mela’ in Setembar e a ‘Filo dei sapori’ in Otubar a Tumieç. Lis ricetis dai cjarsons dolçs e aes jerbis a son chês di Piedim, ancje se o pues dî che no esist une recipe uniche dai cjarsons di Piedim, parcè che ognidun al fâs la sô cu lis sôs variantis. Nô o vin cirût di fâ une sielte delicade, belançant insiemi adiriture 15 jerbis. Par nô chest periodi fin in Avost al è impegnatîf parcè che lu dedichìn a cjapâ sù lis jerbis indulà che si pues, comprant chês che a mancjin. Dopo lis curìn, lis cueìn e lis conservìn par garantî la continuitât dal prodot dut il timp dal an. Vê un laboratori in Cjargne e je une fortune: i nestris prodots a son domandâts in dut il Friûl e a àn un valôr in plui pal fat che a son fats in Cjargne cun prodots cjargnei (formadi frant, nolis, pastorut di Sudri, cavocis nostranis…). Mi è capitât di fâ su ordenazion ancje farsiduris diferentis di chestis: sparcs, foncs purcins, sclopit, articjocs…”
◆ La cuince dal cjarsons e fâs la diference e Enrico al consee simpri di doprâ l’ont e la scuete fumade pai cjarsons aes jerbis, e ont e scuete fumade cuntun tic di zucar e canele pai cjarsons dolçs. “Il consei no simpri al ven scoltât – al zonte Enrico – ancje parcè che e jentre la vene artistiche dal cogo dal ristorant e cussì mi capite di viodi une biele varietât di presentazions dai miei cjarsons. Ma al va ben ancje cussì.” Enrico al è un zovin cun tante voie di fâ, passion e cuntune vite devant plene incolme di bogns proposits. Cui che al à gust di tirâ la gole, e al è propit il câs di dîlu, al cjate Enrico te sô pagjine Facebook Il.Granello e su Instagram. ❚