I 600 agns de muart di Antoni di Cividât e i 500 de nassite di Vittore Raimondi

An gnûf, aniversaris gnûfs. Come di tradizion in cheste rubriche, ancje tal 2025 no mancjarìn di ricuardâ figuris ecelentis de musiche in Friûl pai lôr inovâi. E par tacâ ben, calìn subit un as: Antoni di Cividât (Antonio da Cividale), muart sîscent agns fa, tal 1425. No si sa trop dal frari domenican che si crôt nassût a Cividât. Al à di jessi jentrât tal convent di Sant Domeni a Vignesie tal 1391, e tal 1403 al jere in chel di Sant Pieri martar a Udin e inmò, ai 8 di Avost dal 1411, al jere tal cjapitul simpri di Sant Domeni inte citât indulà che al è nassût. Il professôr Franco Colussi, tal Dizionari Biografic dai Furlans, al scrîf che Antoni al à di vê passât un periodi a Florence, stant aes notis che e si cjatin in cualchidune des sôs composizions, e daspò a Forlì, Brindisi, Trani e forsit ancje a Rome. Insome, al à zirât. Altri di precîs su di lui, purtrop, no si sa.
◆ De produzion di chest autôr nus restin cinc motets, trê tocs di messe e cinc cjants profans, par un totâl di tredis composizions. Il so stîl, come che al ricuarde simpri il professôr Colussi, al medie il stîl talian e chel francês. Il prin in particolâr intes composizions sacris, il secont in chês profanis, indulà che al met il miôr di se inte melodie, inte ritmiche e intal cuintripont. A esistin diviersis publicazion discografichis indulà che a vegnin eseguidis lis sôs musichis. Tra i grups plui interessants che lu an sunât, o ricuardi l’insiemi strumentâl La Reverdie, il Ferrara Ensemble, e tra i furlans l’insiemi Dramsam di Gurize che i à dedicât dute une antologjie cul titul: “Antonius de Civitate, un musicista friulano tra ars nova ed ars subtilior”.
◆ Stant che chest an di aniversaris taronts di compositôrs e musiciscj furlans o atîfs in Friûl a ’nd è pôcs, o zontìn – dongje di Antoni di Cividât – un predi, no furlan di nassite, nassût cinccent agns fa, tal 1525, a Asolo, tal trevisan: Vittore Raimondi. Un organist cognossût no dome pe sô bravure su lis tastieris, ma ancje parcè che al jere in odôr di eresie, acusât, si crôt, di luteranisim. Nol à di jessi stât processât, parcè che si sa di lui che li di pôc al jere a Vicence a direzi la capele dal domo e ancje a colaborâ cu la Academie Olimpiche visentine. Tal 1577 al è a Udin, indulà che al cjape sù il rûl di mestri di capele te catedrâl, incarghe che al tignarà fin ae sô muart rivade tal 1596. Simpri a Udin, tal 1584, al à publicât chel che si crôt il so unic libri di messis, probabilmentri eseguidis vie pes celebrazions in domo a Udin dal furlan Michele della Torre, vescul di Cenede. Vittore Raimondi, stimât in tiere furlane, al à ricevût ancje la gjestion de capele di San Odorì e al è stât nomenât curât de glesie di Sant Nicolau e Sant Roc intal Borc Puscuel. ❚