Gracionis, pape Francesc

Il vanzeli di cheste ultime domenie di Jugn (Mat. 16, 13-19) nus presente une pagjine che i anzians a àn imparât a cognossi di piçui insù: Jesù i consegne a sant Pieri lis clâfs dal Ream dai cîi, lu rint fuart come une piere e su la piere de fede di Pieri la Glesie no cloparà e no finirà mai. Chestis peraulis a compagnaran la storie cristiane di doi mil agns incà par vie che il pape, come vescul di Rome, al è sucessôr di sant Pieri.
Dut chest, dome par dî che lunis ai 21 di Avrîl a buinore, cuant che e je rivade la gnove de muart di pape Francesc, o soi restât scaturît. Al jere l’indoman di Pasche, la biele fieste popolâr dal Lunis di Pasche, ma subit in me dut si è mudât in altris pinsîrs, imagjins, memoriis e peraulis.
◆ Passade la bugade de emozion, mi soi domandât cemût vivi chestis zornadis e la decision e je stade clare: no vuei lassâmi menâ vie dai aiarons e dai bombardaments di gjornâi e di TV; o tignarai la television vierte al minim e o lassarai di bande il gjornâl; dome cualchi notizie, ma pôc pôc. No vuei restâ peât a ce che altris a professin ma o cirarai di scoltâ il gno cûr; o ricuardarai pape Francesc tal cidin, in ricognossince e simpatie. Chest fin sabide che e ven, cuant che al sarà il funerâl.
◆ A motîf des mês vicendis personâls, mi interesse simpri dut ce che al sa di prepotence, di podê, di abûs te Glesie catoliche e pape Francesc al è stât splendit tal denunziâ dut chest: par cussience o par necessitât al à tirade vie la covertorie de cite dai abûs de jerarchie eclesiastiche e lu à fat cirint di lâ fin insom, fin da pît. Tes denunziis ditis e ripetudis, nol è stât tenar:
◆ “Il clericalismo, favorito sia dagli stessi sacerdoti sia dai laici, genera una scissione nel corpo ecclesiale che fomenta e aiuta a perpetuare molti dei mali che oggi denunciamo. Dire no all’abuso significa dire con forza no a qualsiasi forma di clericalismo.” (Letare dal sant pari Francesc al popul di Diu dai 20 di Avosto dal 2018)
◆ Se te Glesie di vuê e sta cjapant fuarce une gnove mentalitât di paritât che e ven dal Batisim, di responsabilitât dal popul di Diu, di “sinodalitât”, o pensi che al sedi merit di pape Francesc.
◆ Un altri aspiet che o sint ancje vuê necessari, al è stât chel di dâ grande impuartance al scoltâ lis vitimis di cualsisedi sisteme di abûs di podê, di cussience, di religjon e di minôrs. Al è lui che al racomande: “L’ascolto delle vittime è il passo necessario… Nessun silenzio o occultamento può essere accettato in tema di abusi… Questa non è materia negoziabile… È importante perseguire l’accertamento della verità e il ristabilimento della giustizia… Andate avanti!” (Ai partecipants dal incuintri nazionâl talian pe tutele dai minôrs e dai plui vulnerabii, 18 di Novembar dal 2023)
◆ Un altri event, al dipent de mentalitât di pape Francesc e lu vevi tant gjoldût, ancje se il pape nol è rivât a puartâlu a bon fin.
◆ Tal Jugn dal 2019 al jere stât publicât “Amazzonia – Nuovi cammini per la Chiesa e per una ecologia integrale”: un document consegnât a dutis lis Glesiis par une riflession in prevision de assemblee de Regjon panamazoniche. Tal document di discuti a vignivin presentâts vite, teritori, timp, relazions, antropologjie di chei popui de Americhe Latine, in mût che la Glesie, lontane di ogni colonizazion, e podès incjarnâ il messaç dal vanzeli te culture e tal rispiet di chê int.
◆ Il document mi jere tant plasût; di fat, mi someave che al bastàs cambiâ la peraule “Amazonie” te peraule “Friûl”, vite e teritori, timp e antropologjie di là jù te nestre vite e teritori di culì. Fasint cussì, al risultave clâr ce che la nestre Glesie diocesane e varès di fâ: e jere la pastorâl che noaltris predis o cjatavin za prontade e che o vevin dome di praticâ.
◆ Tes mês ilusions, o vevi regalât cun letare acompagnatorie une copie dal document al vescul, a la zonte e ai components dal Consei Presbiterâl Diocesan e ai predis che o incuintravi.
◆ O dîs ce che o pensi: chest strument dal sinodi mandât a dutis lis Glesiis nol jere gradît ai dicasteris romans; pape Francesc indi varès cjapât sù cualchi fruçon te Esortazion apostoliche “Querida Amazonia” che e je biele di lei ma che lui, o scrupuli, al è stât obleât a firmâ. Seont me, une grande sperance mudade in delusion sedi pe Glesie universâl che pe nestre tiere.
◆ Cumò o varès di ricuardâ la “Laudato si’” e “Fratelli tutti”, ma nol è il timp. Ce che o ai nomenât, forsit nol è ce che di plui impuartant al à fat il pape, ma al è ce che o sint plui valit par me. Par ducj, o pensi di ricuardâ la sô umanitât semplice e fragjile e il cirî di vierzi puartis e barcons a “tutti, tutti” intune Glesie cjase famee e… “pace, pace” ae Ucraine, ae striche di Gaza e al mont intîr.
◆ In dut si è strussiât e come noaltris al à fat ce che al à podût.
Pape Francesc, fra riflessions e cidinôrs o sin rivâts dal lunis de tô muart ae sabide dal to funerâl che jo no cjalarai, par restâ lontan di chei sflandôrs e plui tal cidin dongje di te.
◆ Il timp al cor… O stoi scrivint e al è za sul barcon de basiliche di Sant Pieri pape Leon XIV: lu ricêf come un om mandât dal Signôr. Però, i tiei scrits a restaran vierts a lunc sul gno taulinut.
◆ In vite, tu nus âs tant racomandât di preâ par te. Cumò pree tu par nô. Gracionis, pape Francesc; ancje il gno popul ti è ricognossint. ❚