“L’Istitût ‘A. Tellini’ al torne a proponi ai cultôrs, ai studiôs e ai stimadôrs l’itinerari poetic di Giovanni Maria Basso intun ‘corpus’ unitari di facil rinvigniment e consultazion. Chest al favorirà la rivisitazion e la rileture critiche di une produzion leterarie che si impon sot di ogni profîl”.
◆ Cussì e tache la presentazion di Luigi Geromet (vignût a mancjâ ai ultins di Mai di chest an) che in chê volte al jere president dal Istitût. Al è un libri di passe cuatricent pagjinis, par cure di Fausto Zof. Al ten dentri dute (o scuasi) la produzion poetiche di G. M. Basso (1933-2020), cognossût ancje tant che Miut dai Bundins di sot. Natîf di Orsarie di Premariâs, al à vude fin di zovin la passion pe poesie che lu à puartât a fâ part dal grup leterari La Cjarande. La sô culture si le à fate di bessôl, di autodidat. E cun di fat, cemût al motive Gianfranco D’Aronco inte prefazion, Basso al è stât un poete naïf, sclet e diret: la sô scriture e jere la ‘confession vierte di une anime’. Al cjalave la nature ator di se, i cjamps, lis monts, il soreli, lis stelis, la nêf, lis fiestis, la int e, naturalmentri, il Nadison e il Friûl. E al traduseve dut chest cjalâ in emozions che al trasmeteve al letôr cun semplicitât. I viers a son ancje chei sempliçs, nol cîr mai la rime (fûr che in Orassion, p. 396), ma al disvilupe il so discors cence ricercjatecis estetizantis. A fâ date dal 1978, al à metût adun vot racueltis: Bugadis, Mans ruspiosis, Int nestra, Spinis e rosis, Pensiers e preieris, Sbuligâ di mindusiis, Tramagnò di sgrisui. A gno mût di viodi lis miôr pagjinis a son chês che a fevelin di personis, di oms e feminis furlanis che lui al à cognossût e preseât: nona Berta, barba Nadâl, agna Palonia, Chila dei Momeis, Gijlinda da vuera, Checo da pala, ‘Sepio om di savietât, Tilio il tulugnot, Filìs il purcitâr, e tancj altris.
◆ La varietât doprade e je chê di Orsarie, fûr chê undis poesiis intal furlan di Gjiviane, cu la -o. I tescj a son stâts revisionâts inte grafie uficiâl. La lenghe e je une vore vivarose, siore di peraulis che no si sintin dispès: flùima, bissiboria, potoriis, snissilâ, smussulâ e v.i.
A son di segnalâ ancje i biei dissens di Anna Degenhardt e di Ivaldi Calligaris che a insiorin il volum. ❚
