Giorgio Morocutti, Sindic dal plui piçul paîs de Cjargne

Comunitât Montane di agns in predêl, comuns che si unissin e che si dividin, competencis e autonomiis che si smamissin, il stât che al bandone il teritori sierant struturis e servizis, fadie a fâ cuadrâ il za magri belanç… cuâl puedial jessi il doman par un comun di mont?
Lu vin domandât al sindic di Liussûl, il plui piçul comun da Cjargne: jessi sindic vuê nol è par nuie sempliç, soredut se tu ti cjatis a fâlu intune realtât di mont che e conte 140 animis. Giorgio Morocutti si cjate, pe seconde volte, a jessi sindic di chest paisut.
“Lis primis dificoltâts a son chês di rivâ a conciliâ il lavôr cu la ativitât aministrative – al conte Giorgio – jo no domandi nissun rimbors e i dopri lis feriis e i permès aziendâi par no pesâ su la economie dal comun. Spes mi cjati a valutâ a cuale riunion lâ, par no pierdi timp preziôs par fâ altris robis o o cîr di lâ a chês fûr dal orari di lavôr o inmò miôr, cuant che la mê presince no je indispensabile, i mandi il gno vicesindic che jessint in pension al pues dedicâsi un pôc plui di me. Tes piçulis comunitâts il sindic al è in trincee: al è a diret contat cu la int e partant al scuen ancje vê rispuestis imediadis. La int cuant che e viôt che no tu fasis ti ven a tirâ pal gjachetin”.
Tai prins ponts dal so program eletorâl, Giorgio, al à metût l’obietif di rivâ ae fusion dal so comun cun chei di Trep e Paluce. Secont lui al è il prin pas di fâ par rivâ al comun di valade: un ent locâl di bessôl di Darte a Paluce cun 10 mil abitants. Dut chest al puartarès a rasonâ sui grancj numars, a podê contâ su la realizazion di grancj progjets. “Cuant che a son i numars, tu contis alc! – al dîs il sindic – O cirarai in chest timp di transizion di contatâ i miei coleghis par fâ in mût che lis stangjis che a sierin dentri i propris ortuts a vegnin gjavadis par podê cjalâ un pôc plui in là dal propi nâs. La ocasion e je propit cumò che la Regjon e sta viodint di fâ une leç pal riordin dai ents locâi. Cumò la fusion e devente plui concrete. Jo mi soi cjapât la responsabilitât di contatâ i miei coleghis (Trep e Paluce) par viodi insieme di frontâ un percors di fusion. In cheste suaze i problemis di lavôrs publics, o di stradis di sistemâ a deventin di secont ordin. La robe plui impuartante a son i servizis chu ur tu dâs aes personis in mont. Mi ven tal cjâf un dai tancj: achì no vin buteghis di alimentârs, o vin dome une ostarie che a fin di Avost e sierarà. In chest câs rivâ a vê un servizi di bus che al ziri lis frazion par dâ la pussibilitât ai paisans, soredut ai anzians, di movisi al devente di fondamentâl impuartance. Un altri esempli a son lis scuelis: par me lis pluriclassis no àn di esisti plui. O vin di formâ scuelis seriis che a indrecin benon i nestris fruts viers il lôr doman. Ma chrstis robis tu lis fasis se tu âs une fuarce, se tu ti metis insieme a chei altris comuns”.
Insome il sindic di Liussûl al è determinât e soredut al crôt che “nol è plui timp di spietâ, cumò al è di movisi e jo o larai in chê direzion par no fâ murî cheste tiere di Cjargne”. ❚
Marta Vezzi