Gianluca Franco, “See the sky about Rain. Balade pai timps di ploie”, Pasian di Prât, 20

“Pensait a doi sarpintuts verdulins, a dôs bissutis che a si movin dentri di un grant ûf plen di licuit flusc. A son altris bissis dentri intal ûf, di colôrs ganzants, ma nissune no je verduline come chei doi. Ta chel buligam di viers a parin cirîsi, corisi daûr, ma movintsi come a câs, come une direzion segnade zirant dulintor fin a intopâsi un cun chel altri”.
◆ Nol è l’incipit dal romanç, che al scomence cinc pagjinis plui innà, ma une sorte di premesse che e conte la gjenesi de vite. Che e à a ce fâ cul licuit e cui sburts des sôs ondis. E, cun di fat, il vêr protagonist dal libri e je la aghe. In forme di ploie, di brentane. Che chenti e fâs sdrumâ une scuele cun dentri i fruts, sot forme di une inondazion spaventevule in Cine intal 1931 e une ancjemò piês, simpri in Cine, intal 1938; ma, cheste volte, nol è stât colpe il diu des ploiis, ma l’om cu lis sôs decisions insensadis.
◆ No mancjin, clâr, altris personaçs che Gianluca al scrutine cun precison la lôr psicologjie. Un om al pues deventâ un eroi, ma no sopuartâ i cambiaments che chest fat al puarte inte sô vite. Un altri al pues cjatâ fin dentri inte disgracie la fuarce di tornâ a fâsi une vite di sodisfazions. Une zovine e pues restâ picjade a un telefonin che no i rispuint mai, un gjornalist capî che e sarès ore di tirâsi in bande, prime che cualchidun no lu pari fûr. Si intopisi ancje in personaçs che po a sparissin fin a someâ pierdûts. Ma nuie pôre: intes ultimis pagjinis a tornin ducj!
◆ Cemût che si lei inte motivazion de jurie dal premi S. Simon (che chest libri al à vint intal 2020) no simpri i inserts metûts come leam fra i episodis a son clârs. Ma e je vere che il messaç che la leture e trasmet al è di grande umanitât, scuasi un invît a no rindisi mai, parcè che la vite e vâl simpri la pene di jessi vivude. Di chê altre bande, però, al è ancje cui che la vite le refude. Robe che no je mai facile di capî: “Cemût puedie someâ tant brute la vite?” (p. 29). E invezit cui che al varès buinis motivazions par butâsi vie, si jeve sù cun fuarce, al monte su la biciclete e al torne a pedalâ cuintri la disfortune.
◆ Infin, no si pues fâ di mancul di segnalâ un altri merit dal libri, ven a stâi la vivarositât de lenghe doprade, siore di peraulis preseosis. ❚