Futûr di rive sù pai veicui eletrics in Slovenie

‘12% prime de fin dal 2030’. Magari cussì no, al pâr impussibil tocjâ dentri di cinc agns e mieç l’obietîf che si è fissât il guvier sloven dal prin ministri Robert Golob par chel che al inten la percentuâl di veicui eletrics sul totâl di chei che a circolin tal Paîs nestri vicin. O scrivìn ‘magari cussì no’ parcè che si à a ce fâ cu la tutele dal aiar e dal ambient, stant che l’incuinament nol cognòs confins, e duncje a son cuistions che a tocjin ancje il Friûl.
◆ La percentuâl che l’esecutîf di centriçampe di Lubiane si insumie di tocjâ e je pardabon une vore lontane, stant che cumò il totâl dai veicui pal 100% eletric al passe di pôc l’1%… Cun di plui, i dâts dal 2024 a lassin a bocje vierte in maniere cetant negative: di fat, vie pal an passât a son stadis matricoladis dome 3.142 machinis di chest gjenar, vâl a dî mancul dal 6% dal totâl dai veicui matricolâts, che a àn fat segnâ in dut une incressite dal 8,4% a pet dal 2023. Nol è avonde: i veicui eletrics comprâts tal 2024 a son stâts il 38% di mancul a pet simpri dal ‘23, si che duncje si viôt a clâr che la tindince e sta lant juste de bande contrarie. Fasint doi conts, par rivâ a chel 12% che al volarès vê l’esecutîf, a varessin di jessi vendudis 145 mil machinis a eletricitât prime dai 31 di Dicembar dal 2030.
◆ A son risultâts dal dut diviers di chei scrits tal Plan nazionâl pal Clime, fat bon dal guvier. Dal sigûr un dai motîfs che a discjolin la int dal comprâ une auto eletriche al è il presit, ancjemò avonde alt pai modei di ducj i produtôrs di veicui.
◆ De bande sô, il Stât al furnìs jutoris in forme di finanziaments economics: la cuote di contribûts dal guvier no rive dut câs a plui di 7.200 euros par machine. Il diretôr gjenerâl de Direzion pe Politiche dai Traspuarts li dal Ministeri dal Ambient, dal Clime e de Energjie, Darko Trajanov, al à vût marcât il fat che il Stât al varès di sigurâ plui finanziaments par cui che al à chê di cjoli modei eletrics mancul cjârs e ancje pai veicui di seconde man, che in dut a son il 30% des domandis di acuist.
◆ In cheste situazion, alc di positîf al è. Cun di fat, i ponts di ricjarie a son une vore e ben sparniçâts in dut il Paîs: cumò come cumò a son almancul 1.500 sui 20.271 chilometris cuadrâts che a cjapin dentri la Slovenie. ❚