Furlans in Australie: chei di cumò

A tiravin sù cjasis, stradis e feradis. A lavoravin te industrie metalurgjiche, metalmecaniche, eletriche, tai cjamps e tes minieris. A jerin i emigrants furlans in Australie tal dopovuere, 230mil personis jenfri il 1946 e il 1958, stant ai dâts dal archivi multimediâl de memorie de emigrazion regjonâl. E coventave lavoranzie par fâ cressi la machine economiche dal paîs. Ma la Australie ise ancjemò tiere di emigrazion pai furlans? «Sigûr, vuê pe plui part a rivin dopo il diplome o la universitât, a àn jenfri i 20 e i 30 agns» e dîs Ilaria Gianfagna, 35 agns, di Udin, emigrade a Melbourne, 16mil km di cjase, li che e à viert insiemi cun Stefano Riva, udinês ancje lui, “Just Australia” (www.justaustralia.it), il prin Infopoint gratuit de citât, specializât in percors di studi e di lavôr.
GNOVE STRADE
«Cui che al rive dal Friûl no lu fâs par disperazion ma par curiositât, par provâ une strade gnove» e dîs «chi nol è plui l’Eldorado, ma il lavôr nol mancje e cui che al à voie di fâ, al pues vivi e lavorâ benon». I mûts par lâ a stâ là vie a son trê: «Cul vistât “Working Holiday” si pues stâ un an e, dopo 3 mês di lavôr tai cjamps, si pues rinovâ par un altri an» e sclarìs. «Dopo doi agns, o par cui che al à plui di 31 agns, al è il “Student Visa” che al previôt di iscrivisi a un cors e al da la pussibilitât di lavorâ part time. E par ultin a son i mistîrs une vore cualificâts che il guvier al cîr e al publiche intune liste: par esempli chefs, miedis, inzegnîrs». Ma i gnûfs emigrants furlans fasino comunitât tra di lôr come che al sucedeve pai lôr nonos? «Si cjatìn dispès, o cirìn di dâsi une man e di lavorâ insiemi cuant che o podìn» e rispuint «chi o sin lontan di dut e intun contest cetant diviers, cjatâsi nus fâ sintî un pôc a cjase». E i Fogolârs? «Par dî il vêr chei no, nissun di nô ju frecuente». ❚
✒ N.G.