FURLANS, DIGJITAIT FURLAN. Un teritori dut par furlan cu lis mapis libaris

Il mont de cartografie e de gjeografie al è un di chei che a àn vût i plui grancj cambiaments intai ultins agns. Lis cjartis gjeografichis planc plancut a vegnin sostituidis di chês vie Internet e, cu la difusion dal sisteme GPS, tancj a doprin (cun plui o mancul sucès) i navigadôrs par lâ di un puest a di chel altri.
Ma ce isal ae fonde di chest fenomen? Cuant che o fevelìn di une cjarte o di une mape, o intindìn doi tocs diviers: i dâts e l’ûs che o podìn fâ di lôr. I dâts a son, par fâle curte, un insiemi di carateristichis gjeografichis, cu lis coordenadis e i atribûts colegâts. Fasìn l’esempli des stradis: une strade e pues jessi rapresentade cuntune rie fate di tancj ponts e cheste rie e varà un non, une impuartance e altris atribûts. Su la base di un insiemi di chestis informazions si pues fâ un “rendering”, che al cree la mape vere, o cuntun algoritmi di routing si pues meti sù un servizi che ti da lis indicazions par rivâ intun puest.
Lis realtâts plui cognossudis – tant che Google Maps o Tuttocittà.it – a son sì bielis e comudis, ma dai doi tocs che o vin a pene dit nus ufrissin dome il secont, che al è ancje chel di mancul valôr. Si capìs che se un al à a disposizion il dât che al è sot al pues inventâsi ancje câs speciâi – par dî, la navigazion par personis cun disabilitâts –, doprant invezit un servizi come chel parsore tu âs di contentâti: se il gjestôr al à zontât la funzion che tu vuelis bon, se no no tu puedis fâ nuie.
Par risolvi chest probleme ce che al è stât pensât al è OpenStreetMap, un sisteme simil ae Vichipedie che – su la base de colaborazion dai utents – al à l’obietîf di meti dongje un insiemi di dâts libars e il plui complet pussibil. Sul sît dal progjet si pues ancje cjatâ une mape za pronte, ma la bielece dal progjet e je che cheste e je une des mapis pussibilis: viodût che i dâts daûr a son a disposizion, o podìn pensâ di fâsi une mape personalizade (e tancj a àn za aprofitât di cheste oportunitât), magari di cualchi element particolâr. Par fâ un esempli, a son utents impegnâts a inserî ducj i puescj dulà che si pues fermâsi a bevi un got di aghe, come lis fontanutis, o utents che a prontin mapis che a son pensadis par int che e va in biciclete o par robis plui seriis tant che une mape sui sîts nucleârs tal mont.
Un efiet di cheste vision e je che i erôrs des stradis a puedin jessi corezûts in pôc timp: probabilmentri tancj a àn viodût cualchi erôr su lis mapis online, dai nons sbaliâts a stradis di cjamp segnadis come se a fossin asfaltadis, gnovis croseris che a mancjin, e vie indevant. Ancje ducj chescj problemis si puedin evitâ cun OpenStreetMap.
E par chel che al rivuarde lis minorancis? Come che o vin dit, ogni ogjet gjeografic (strade, paîs e dut il rest) al à un ciert numar di atribûts o di etichetis (par inglês “tag”) e une di chês plui impuartantis al è il non (name). Ancje se no podìn in Friûl meti in cheste etichete ancje il non par furlan (etichete “name”) che purtrop nol è uficiâl, su OpenStreetMap ognidun al pues zontâ etichetis particolârs, baste che no sedin robis inventadis. Par chest, nissun nus impedìs di zontâ une etichete “name:fur” cun dentri il non pal furlan; e se si vûl si pues ancje vê un “loc_name” cul non te variant locâl. Po, une volte che il dât al è inte base di dâts, si pues vê un processament (rendering) personalizât e o podarìn vê une mape di chest gjenar: mapefurlane.eu, che e sarà dificil di viodi suntun altri servizi Internet di mapis.
Cemût judâ? Come che o vin dit, la idee ae base di chest progjet e je come chê de Vichipedie, duncje o vin dome di regjistrâsi e si pues daurman scomençâ a meti dentri i nestris dâts. I problemis a vegnin dal fat che modificâ i dâts gjeografichis nol è imediât come cambiâ un test: o racomandìn duncje di lei la documentazion dal progjet disponibile tes principâls lenghis e, se si àn dubis, domandâ su la liste di distribuzion des comunitâts taliane e furlane, che e je une des plui vivarosis.
Di dulà cjapâ i dâts? Come pe Vichipedie, si à di rispietâ il copyright, duncje no si pues copiâ di altris mapis (ancje se chest nol è un probleme pai toponims furlans), ma si à miôr basâsi su la cognossince locâl dai nons des viis e dai paîs e sui percors regjistrâts personalmentri dai utents. Dongje di chest, une des origjins preferidis pai dâts e je chê di cjalâ i dâts regjonâi: ogni regjon taliane e à di fat une schirie di dâts gjeografics une vore ben fats (par esempli, une mape di ducj i flums) e al è un moviment che al cîr di sburtâ e convinci lis regjons e lis aministrazions locâls a meti a disposizion chescj dâts, viodût ancje che a son stâts creâts cun bêçs publics. Su chest aspiet, la regjon Friûl Vignesie Julie e je une des plui avanzadis, e di fat la mape disponibil su OpenStreetMap pe nestre regjon e je avonde complete, cun ancje ducj i edificis.
Par concludi, come pe Vichipedie, il progjet nol è complet e  in cierts puescj lis informazions a podaressin jessi ancjemò limitadis, ma utents e dâts a son in cressite continue. E, par gno cont, miôr vê une mape par furlan o par gaelic vuê un tic limitade che vê vuê e doman une mape dome par talian o par inglês, cence podê meti lis mans parsore.
Andrea Decorte