“Fûc su Gurize”Capitâl europeane, ma defurlanizade

A Gurize e in dut il Friûl orientâl prin dal 1915 ancje il plui scuintiât dai contadins al saveve cuatri lenghis: todesc, furlan, talian e sloven. E no par vie de scuele, che sot dal Imperi dut câs e jere miôr di chê dal Ream de Italie; ma par vie che lis lenghis a coventavin par lâ a vendi a marcjât lis ortaiis o i grans o lis bestiis, e i clients a podevin jessi di ogni divignince. No capîju al jere pierdi bêçs. Intune zone di cunfin che e jere di secui teatri di scuintris ma ancje soredut di une contaminazion di popui e di fevelis diferentis, cognossi i codiçs di espression, lis peraulis, lis detulis, lis esclamazions e jere une maniere par interpretâ lis bisugnis di chei altri e lâur incuintri, in maniere di vuadagnâ cualchi franc e convivi ducj contents.
◆ Dopo e je vignude la Prime Vuere Mondiâl, chê che i Talians a clamin la “Vuere grande”: di grant e à vût dome il numar di muarts e il scjàs che e à creât su chest teritori, ma la retoriche nazionalistiche le à mudade intun event salvific, che al varès puartade la redenzion di tieris che pal Re e pai siei soldâts a jerin di simpri talianis, ancjemò prin che e esistès l’Italie.
◆ Di fat no son cambiâts dome i parons di chescj teritoris, ma e je cambiade soredut la prospetive: chê frontiere dulà che int, marcjanziis, lenghis e ideis a passavin e si inluençavin une cun chê altre e je deventade un cunfin invalicabil, une bariere insormontabile, un mûr par dividi par simpri ce che la Storie ben o mâl e veve tignût ancjemò unît.
◆ Cumò, dopo otante agns di fassisim e e di vuere frede, il slargjament de Union Europeane al veve di ricostruî la atmosfere di prin e favorî il dialic, che intune operazion come Go2025 al sares di une impuartance fondamentâl. Invezit il cunfin al è ancjemò: talians e sloven cu lis cjacaris magari a mostrin di volêlu tirâ jù, ma la bariere mentâl e reste. Prin di dut e sburte a scancelâ dutis chês altris fevelis e a trasformâ une citât de storie multietniche in doi blocs monolitics. E po e creve ogni sperance di fâ florî parsore dal fîl spinât de Cortine di Fier un zardin di tancj colôrs, come che tantis a jerin lis lenghis de storie gurizane.
◆ Ce che al fâs dûl al è che e continue – cuntune fuarce crudêl e cence remission – la nancje masse cidine “defurlanizazion di Gurize” che Gianni Nazzi, mestri di identitât, al veve za piturade intun so saç tal 1993. Un altri mestri di pinsîr libar dal Friûl orientâl, Ferruccio Tassin, al riflet sui stes temis metint in lûs trop che vie pai secui chestis tieris a sedin stadis une crosere di diviersitât. “La Patrie” e je la cjase dai furlans che no si rindin: e par chest e à volût meti dongje un libri zontant insiemi lis peraulis che chescj doi inteletuâi a doprin par descrivi ce che e jere cheste culture di cunfin e ce che e vares di tornâ a jessi. Il test si intitule in maniere significative “Fûc su Gurize”, e in maniere provocatorie lu vin voltât par furlan e par inglês, stant che Go2025 e à sielzût di ignorâ ducj chei che no fevelin par talian o par sloven. Lu presentarìn a Gurize ai 3 di Avrîl, pe Fieste de Patrie; e a Udin ai 4 di Avrîl, parcè che e je une cuistion che e rivuarde dute la nestre int, e par sigûr a van ben lis celebrazions, ma al covente ancje fevelâ cun clarece de volontât di scancelâ un trat identitari di une des parts plui impuartantis de nestre tiere. ❚