FRIÛL EUROPE. Lis dôs musis de Comission Juncker

Cul prin di Novembar e je in vore la gnove Comission europeane, vuidade dal lussemburghês Jean-Claude Juncker. Mancul di dôs setemanis prime, ai 22 di Otubar stâts, il Parlament european al veve votât la fiducie par chel che – magari cussì no, ancjemò masse “tra virgolutis” – si varès di calcolâlu tant che il guvier de Union Europeane. A pro de scuadre di Juncker a àn votât in 409 di lôr, ven a dî i eurodeputâts dal grup dal Partît popolâr european (Ppe) e di chei dai socialiscj e dai liberâi e democratics, intant che si son astignûts i 67 Conservadôrs e a àn votât cuintri in 209, ven a dî i antieuropeiscj di drete e i europeiscj critics de Çampe europeane e dal grup che al ten dongje i Verts e i nazionalitaris e regjonaliscj de Aliance libare europeane.
Si siere cussì la ete de presidence Barroso e al rive insom ancje il percors preliminâr che pe prime volte al à viodût incressi il profîl politic de Comission, stant che di une bande Juncker al jere il candidât president presentât dal Ppe che aes elezions de Vierte passade al à cjapât plui sentis tal gnûf Parlament di Strasburc e di Bruxelles, e di chê altre chei che a son deventâts comissaris a son stâts valutâts e tamesâts propit de bande dai eurodeputâts, inte suaze des audizions fatis a nivel des comissions parlamentârs.
Une conferme, in tiermins positîfs, dal valôr simbolic e concret di cheste procedure si le cjate tal bon nivel di compatece dai grups parlamentârs che a àn dât la lôr poie ae Comission Juncker, stant che ai timps di Barroso a jerin stadis diviersis divisions dentri de “maiorance” che e veve votât la fiducie a chê Comission. Une altre e diven de decision di Juncker di tignî cont des indicazions dal Parlament european in cont dai comissaris e des deleghis, a tacâ de boçadure de slovene Alenka Bratušek e de sô sostituzion cun Violeta Bulc e dal ridimensionament des deleghis dal ongjarês  Tibor Navracsics, cu la atribuzion de «citadinance» al grêc Dimitris Avramopoulos.
Cun dut achel, ancje chê vuidade di Juncker e mostre a fuart une sostance intergovernative, a tacâ de sô composizion, stant che tancj comissaris no son stâts dome indicâts dai guviers ma a jerin fintremai components dai esecutîfs dai Stâts. Cun cheste cjaladure e colpìs propit la figure di Navracsics, che al jere stât criticât intant des audizions sei pal so profîl personâl sei par vie des politichis metudis in vore de Ongjarie, là che al jere vice premier e ministri prime de Justizie e po dai Afârs forescj. ❚
✒ Marco Stolfo