Il PE ur gjave la imunitât ai catalans Puigdemont, Toni Comín e Clara Ponsatí

Une altre brute figure pe Union Europeane e pes sôs istituzions. Dopo de Comission, che doi mês indaûr de Comission Europeane e sielzeve di no cjapâ sù lis propuestis fatis indenant cu la iniziative dai citadins Minority SafePack, ai 8 di Març stâts al è stât il Parlament (PE) a mostrâ di jessi dipendent dai Stâts e dai lôr nazionalisims, votant a maiorance a pro dal ritîr de imunitât garantide fin cumò ai trê eurodeputâts catalans Carles Puigdemont, Toni Comín e Clara Ponsatí.
◆ L’ex President de Generalitat, Puigdemont, e i doi ex consellers (ven a dî “ministris” o “assessôrs”) dal guvier catalan, Comín e Ponsatí, a son acusâts tal Stât Spagnûl di reâts grâfs che a àn a ce fâ cul lôr rûl inte organizazion e inte gjestion dal referendum pe indipendence dal prin di Otubar dal 2017. Dopo jessi lâts in esili, i prins doi inte Belgjiche e la tierce in Scozie, là che e jere za a vore tant che professore inte Universitât di St. Andrews, si son candidâts pes elezions europeanis dal 2018 e a son stâts elets inte assemblee di Strasburc e Brussel.
◆ Chês fatis indenant cuintri di lôr a son dutis acusis di caratar politic. Cun dut achel – o ben, magari cussì no, juste par chel – i eurodeputâts a maiorance a àn a votât par che ur vegni gjavade la imunitât. Tal câs di Puigdemont, a àn votât a pro de revoche in 400 di lôr, intant che si son esprimûts cuintri 245 e altris 45 si son astignûts, e a son sù par jù compagns i numars par Comín e Ponsatí: 404 a pro, 247 cuintri e 42 astignûts.
◆ Il vôt al jere segret e, tignint cont des declarazions di vôt e fasint doi conts, si viôt che a àn votât a pro de revoche i popolârs, la massime part dai conservadôrs e la plui part dai grups dai socialiscj e dai liberâi, là che za ae vilie de votazion cualchidun di lôr – par esempli la eurodeputade dal Partît Nazionalist Basc (EAJ-PNV) Izaskun Bilbao Barandica – al veve palesât la sô posizion diferente. Chei che impen a àn votât cuintri cun convinzion a son i eurodeputâts dai grups dai Verts/Aleance Libare Europeane e de Çampe Europeane. Altris vôts a pro, dongje des astensions, a son rivâts dai membris di chei altris grups plui piçui.
◆ Par efiet dal risultât dal vôt si tornaran a inviâ lis proceduris pe estradizion dai trê europarlamentârs, par che a vegnin judicâts de justizie spagnole. Cumò la bale e passe ai tribunâi de Belgjiche, dulà che a son a stâ Puigdemont e Comín, e de Scozie, là che e je domiciliade Ponsatí.
◆ Timp indaûr, la magjistrature belghe e veve za dineât la estradizion tal Stât Spagnûl di un altri ex conseller catalan, Lluis Puig, ancje lui in esili a Brussel, contestant lis fondis dome che politichis des acusis cuintri di lui.
◆ Cun chel vôt, il PE al à dât la sô poie ae strategjie persecutorie che e ven puartade indenant de bande de classe politiche e dai tribunâi dal Ream di Spagne. In chê posizion nol è dificil ricognossi une continuitât cul ategjament mantignût des istituzions europeanis intant che Madrid al mandave polizie e militârs a petâ milions di eletôrs catalans in file denant dai seçs par partecipâ al referendum  dal prin di Otubar dal 2017.
◆ Cun dut achel, al è un dât positîf: tra vôts contraris e astignûts, a son sù par jù 300 di lôr. Pal rest, magari cussì no, lis istituzions europeanis a mostrin di pierdi (ancjemò) credibilitât e autorevolece, juste intal moment che la dibisugne di une Europe pardabon “unide inte diversitât” (e intai dirits di fonde e intes libertâts) e je ancjemò plui fuarte. ❚