Un vôt progressist e di cambiament che al marche la fin dal duopoli Fianna Fáil / Fine Gael
Prin partît pal numar di vôts, secont su la fonde dal numar des sentis inte Cjamare. No son dubis: il vincidôr des elezions politichis che a son stadis inte Republiche di Irlande sabide ai 8 di Fevrâr al è Sinn Féin (SF). Pal partît nazionalitari di çampe che, dopo de smilitarizazion e dal sfantament sostanziâl dal Esercit Republican Irlandês (la innomenade IRA, Irish Republican Army, par tancj agns impegnade inte lote armade inte Irlande dal Nord), si à struturât ad implen ancje intes vincjesîs conteis de Republiche, lis votazions a son ladis sù par jù cemût che si spietavisi (o forsit ancjemò miôr), daûr dai scandais demoscopics fats prime de vierzidure dai seçs.
Il SF al à cjapât il 24,5% dai vôts, cuasi dopleant la percentuâl dai consens che al veve vût tal 2016 (13,8%) e la sô afermazion e à crevât il bipolarisim (ma al sarès miôr fevelâ di duopoli) fondât su la alternance tra i “liberâi” dal Fianna Fáil (FF) e i “democristians” dal Fine Gael (FG). I doi partîts conservadôrs a àn pierdût consens: il FF si à fermât al 22,2% (2,2% di mancul dal 2016) e il FG ancjemò plui indaûr, al 20,9%, cuntune pierdite dal 4,7%. Il SF nol à gjavât vôts dome al centridiestre, ma al à pescjât ancje a çampe: i laburiscj a son lâts jù al 4,4% (mancul 2,2%), la liste radicâl Solidarity-People Before Profit (S-PBP) e à cjapât il 2,6% (mancul 1,3%), i candidâts indipendents a àn vût in dut il 12,2% (mancul 3,5%) e altris partîts minôrs che tal 2016 a vevin passe il 4% a àn otignût dome l’1,3%.
Dongje de afermazion dal SF e je ancje chê dai Verts, che a passin dal 4,4% al 7,1%, intant che i socialdemocratics a tegnin bot, passant dal 3% al 2,9% (-0,1) e a vuadagnin une piçule rapresentance cul 1,9% ancje i centriscj di Aountù, nassûts di pôc di une division a diestre dal SF.
Chel irlandês si pues definîlu un vôt progressist e di cambiament. Il SF in particolâr si à presentât tant che une alternative fuarte ai doi partîts di centridiestre e al à fat indenant rispuestis claris sedi ae grande domande di benstâ sociâl e di dirits sedi al discontent dai zovins viers di un sisteme economic là che i profits des grandis impresis e la incressite dal Pil – che di chei si veve svantât l’ex prin ministri Leo Varadkar (FG) – no produsin in automatic ni cundizions di vite miôr, ni stipendis plui alts e nancje plui servizis pe int. Cun di plui, il SF al è stât bon di presentâsi e par chel al à vût sucès.
Magari cussì no, però, nol à rivât a fâ rindi ad implen i consens cjapâts sù (in ciertis zonis dal Nord e de citât di Dublin al à passât il 40%). Cun di fat, stant che il sisteme eletorâl irlandês al è proporzionâl ma cul vôt singul trasferibil, che al permet ai eletôrs di sielzi plui candidâts de stesse liste o ancje di listis diviersis cuntune prime preference e altris sieltis di rive jù, une part dai siei vôts a son lâts pierdûts tal moment de assegnazion dai seçs, dut a pro di chês altris listis, massime di chês dal FF e dal FG.
Cul savê di dopo, si pues dî che il SF al à fat l’erôr di presentâ intes 39 circoscrizions eletorâls dome 42 candidâts. L’intindiment al jere chel di no dispierdi vôts tra i siei rapresentants, stant che daûr dai risultâts plui resints des aministrativis e des europeanis, si pensave di fâ miôr, ma no cussì tant, impen al sarès coventât cualchi concorint di plui. Cussì tal Dàil (la Cjamare) cumò a son 38 deputâts dal FF, 37 dal SF, 35 dal FG, 12 verts, 6 laburiscj, 6 socialdemocratics, 5 di S-PBP, un di Aountù e 20 indipendents. Par rivâ a meti dongje une maiorance di guvier a coventaran tratativis lungjis e complicadis. ❚
